ჩრდილოეთ კორეის სახელმწიფო მედიამ ახალგაზრდებს მოუწოდა, არ გამოიყენონ სამხრეთკორეული სლენგი და ისაუბრონ მხოლოდ ჩრდილოეთკორეულ სტანდარტულ ენაზე.

სახელმწიფოს დაქვემდებარებაში მყოფმა გაზეთმა ახალგაზრდები ასევე გააფრთხილა, რომ არ გადმოიღონ სამხრეთკორეული მოდა, თმის ვარცხნილობა და მუსიკა. ყველაფერი ეს კი ახალი კანონპროექტის კვალდაკვალ ხდება, რომლის მიზანიცაა უცხოური გავლენის აკრძალვა და მსგავს პრეცედენტზე "საკადრისი პასუხის" გაცემა. საკადრის პასუხში კი თავისუფლების აღკვეთასთან ერთად სიკვდილით დასჯაც მოიაზრება.

"იდეოლოგიური და კულტურული შემოჭრა ბურჟუაზიის ფერადი ბანერებით იმაზე უფრო სახიფათოა, ვიდრე ის მტერი, რომელიც შეიარაღებული მოდის", — წერია Rodong Sinmun-ის სტატიაში, რომელიც მილენიალების თაობას სამხრეთკორეული პოპკულტურის საფრთხეზე აფრთხილებს.

სტატიაში ასევე აღნიშნულია, რომ კორეული ენის ფხენიანური დიალექტი უმჯობესია და ახალგაზრდებმა ის სწორად უნდა გამოიყენონ.

ფოტო: Michael Kovac / Getty Images / The Recording Academy

ჩრდილოეთ კორეის კომუნისტური რეჟიმისათვის, რომელსაც სათავეში კიმ ჩენ ინი უდგას, უცხოური გავლენა საფრთხედ აღიქმება. თავად კიმ ჩენ ინმა ცოტა ხნის წინ K-pop-ს "კიბო" უწოდა და ის ჩრდილოეთ კორეის ახალგაზრდობის გარყვნაში დაადანაშაულა.

ყველას, ვინც სამხრეთკორეული, ამერიკული ან იაპონური მედიის ჭარბად მოხმარებისთვის დაიჭირეს, ახლა სიკვდილით დასჯა ელოდება, ხოლო ისინი, ვინც უცხოური მედიის ყურებისათვის დააკავეს, საპატიმროში 15 წელს გაატარებენ.

მკაცრი სასჯელის მიუხედავად, ჩრდილოეთ კორეაში აკრძალულ მედიაპროდუქტზე მოთხოვნა მაინც იზრდება. მას საზოგადოებაში კონტრაბანდისტების დაჯგუფებები ავრცელებენ.

მოთხოვნის გაზრდა კი, როგორც ვარაუდობენ, სამხრეთკორეული დრამებით გამოწვეულ ინტერესს უკავშირდება. ჩრდილოეთკორეისტიკის უნივერსიტეტის პროფესორის განცხადებით, კიმმა, რომელმაც განათებაში შვეიცარიაში მიიღო, "მშვენივრად უწყის, რომ K-pop-სა და დასავლურ კულტურას ადვილად შეუძლია ახალგაზრდების 'მოწამვლა', რასაც, სოციალისტურ სისტემაზე უარყოფითი გავლენა ექნება.

"მან იცის, რომ ამ კულტურულ ასპექტებს სისტემის წნეხის ქვეშ მოყოლება შეუძლია. ამდენად, მათი აკრძალვით, კიმი ცდილობს, სამომავლო უსიამოვნებები თავიდან აიცილოს".