"მოგმართავთ ყველას, ჩვენს თანამოქალაქეებს, ჩვენი ღვინის მსმელებს, დამფასებლებსა და ჩვენი ცხოვრების წესის მცოდნე ხალხს ..." — ასე იწყება ქართველი მეღვინეების საჯარო წერილი, სადაც მკვეთრად ემიჯნებიან ჰომოფობიას, ძალადობასა და ანტიდასავლურ განწყობებს, რასაც, მათივე განცხადებით, ხელისუფლება აღვივებს.

"მიგვაჩნია, რომ ჩვენი ყველაზე დიდი მტერია უმცირესობების შეუწყნარებლობა, რამაც წარსულშიც მძიმე შედეგები გვაწვნია და მომავალშიც მხოლოდ ნგრევითა და სტანგაციით გვემუქრება. მიგვაჩნია, ასევე, რომ სახელმწიფომ მკაცრად უნდა დაიცვას კონსტიტუციით მოქალაქეთათვის გარანტირებული უფლებები და კანონის წინაშე მკაცრად აგებინოს პასუხი ნებისმიერს, ვინც ავლენს ჰომოფობიას, შეუწყნარებლობას, ახორციელებს თუ მოუწოდებს ძალადობისაკენ, იქნება ეს საერო პირი თუ სასულიერო წოდების წარმომადგენელი, სახელმწიფო თანამდებობის პირი, ბიზნესმენი თუ — უბრალო მოქალაქე", — ვკითხულობთ განცხადებაში.

ხელმომწერები აცხადებენ, რომ სამოქალაქო დაპირისპირება და შეუწყნარებლობა აზიანებს არა მხოლოდ მათ, არამედ ეკონომიკის ყველა სფეროს. მათი თქმით, პრობლემა იმდენად "ჯიბეებზე ასახული ზარალი" არ არის, რამდენადაც განვითარების შეფერხება, წლობით ნაშენები იმიჯის ჩამოშლა, ტურიზმის კვდომა და ა.შ.

"დასავლეთის ბაზრებზე გასვლა გადამწყვეტი იყო მეღვინეობის განვითარებისთვის. რუსული ბაზრებიდან იძულებითმა რეორიენტაციამ შესანიშნავი სამსახური გაუწია ჩვენი დარგის განვითარებას. დღეს ჩვენ არა მხოლოდ უფრო ძვირად ვყიდით ღვინოს, არამედ - ვაწარმოებთ გაცილებით უკეთეს პროდუქტს და მყარად ვიმკვიდრებთ ადგილს მსოფლიო ღვინის ოჯახში, საიდანაც ბოლშევიკური ოკუპაციის შემდეგ უსამართლოდ გაგვაქრეს.

დღეს ჩვენ საქართველოს ეკონომიკის გაცილებით დიდ სეგმენტს ვკვებავთ, ვიდრე ეს შეგვეძლო 10-15-20 წლის წინ. ჩვენი დარგის განვითარება სისხლხორცეულად არის დამოკიდებული ჩვენს ღირებულებით და ბიზნეს კავშირებზე დასავლეთთან, რომელიც არის ცოდნის წყარო და იდეებითა და ახალი შემოქმედებითი იმპულსებით კვებავს საქართველოს მეღვინეობას", — აცხადებენ მეღვინეები.

მათი თქმით, ქვეყნის განვითარება პირდაპირ კავშირშია საზოგადოების თავისუფლების ხარისხთან, რასაც, თავის მხრივ, მოაქვს მრავალფეროვნება, შემწყნარებლობა, მშვიდობა, სოციალური კაპიტალი და ა.შ.

მეღვინეებს იმედი აქვთ, რომ მსგავსი განცხადებებს სხვა პროფესიული წრეებიც შეუერთდებიან.