13 ივლისს ემის რიგით 73-ე დაჯილდოების ნომინანტთა სია გახდა ცნობილი და ისტორიული ფაქტიც დაფიქსირდა: მთავარ კატეგორიაში პირველად წარადგინეს ტრანსგენდერი ქალი.

დრამატულ სერიალში საუკეთესო მსახიობი ქალის ნომინაციაში გამარჯვებისთვის იბრძოლებს ემჯეი როდრიგესი, რომელიც ცნობილი ამერიკელი მსახიობი და მომღერალია.

30 წლის ღიად ტრანსგენდერმა ხელოვანმა რაიან მერფის გახმაურებულ სერიალში Pose (პოზა) შესრულებული როლისთვის მიიღო ნომინაცია. წელს მისი კონკურენტები არიან უზო ადუბა (In Treatment), ოლივია კოლმანი (The Crown), ემა კორინი (The Crown), ელიზაბეტ მოსი (The Handmaid’s Tale) და ჯერნი სმოლეტი (Lovecraft Country).

"მჯერა, რომ ეს გადამწყვეტი მომენტია. აქამდე მთავარი როლის შესრულებისთვის ტრანსგენდერი ქალი არ ყოფილა ნომინირებული და ახლა მგონია, რომ ეს ფაქტი ყველაფერს ცვლის და სხვა უამრავი ადამიანისთვის — ტრანსგენდერი კაცებისა თუ ქალებისთვის, არაბინარული იდენტობის მქონე პირებისა და LGBTQIA+ ადამიანებისთვის შესაძლებლობების კარებს ხსნის", — განუცხადა ემჯეი როდრიგესმა Variety-ს.

ფოტო: FX

აღსანიშნავია, რომ სერიალი Pose (პოზა), რომლის სიუჟეტიც 1980-90-იანების ამერიკაში ვითარდება, სწორედ ტრანსგენდერი, გეი და სხვა ქვიარ ადამიანების ცხოვრებაზე მოგვითხრობს. ემჯეი როდრიგესიც ტრანსგენდერი ქალის, ბიანკას როლს ასრულებს.

შოუ პირველად 2018 წელს გამოვიდა, 2021-ში კი მესამე სეზონით დასრულდა.

სატელევიზიო სამყაროში Emmy ყველაზე ცნობილი და გავლენიანი ჯილდოა, რომელიც თავისი მნშვნელობით ოსკარებს უტოლდება. დაჯილდოება 1949 წლიდან იმართება და როგორც საუკეთესო სატალევიზიო შოუებს, ისე სერიალებს, ფილმებსა და მათ შემქმნელებს ავლენს.

ასევე იხილეთ: