გაზაფხული - ზაფხულის სატელევიზიო სეზონს ტელეკომპანია GDS ამბიციურად იწყებს. როგორც არხის ხელმძღვანელობა ამბობს, 2015 - 2016 წლებთან შედარებით, არხის აუდიტორია გაორმაგებულია და მაყურებლები საკულტო სერიალებს ელიან.

"GDS-ს 2017 წელს საინტერესო გეგმები აქვს. ჩვენ არხებს შორის მე-3 პოზიციაზე ვართ, რასაც რეიტინგების მთვლელი TVMR-ის AGB NIELSEN-ის შედეგებიც ადასტურებს. ანალოგიურ შედეგს უახლოვდება არხი TMI (Kantar Media)-ს ოფიციალურ მაჩვენებლებშიც. 2015 - 2016 წლებთან შედარებით არხის მაყურებლების რაოდენობა გაორმაგდა. განსხვავებით ყველა სხვა არხისგან, GDS ორიენტირდება ახალგაზრდებზე. ამჟამად არხს საკუთარი გადაცემები არ აქვს და მთლიანადაა გადართული თანამედროვე უცხოურ სერიალებსა და ფილმებზე; რეიტინგის მაჩვენებლების გაუმჯობესების შემდეგ, დიდი ალბათობით GDS კვლავ დაუბრუნდება ვიდეოკონტენტის წარმოებას", - ამბობს GDS-ის მარკეტინგის დირექტორი ზურა შარაშენიძე.

GDS-ს მოლაპარაკებები ჰქონდა ისეთ კომპანიებთან, როგორებიც არიან Disney, Universal, Warner და Paramount. თითოეული ამ კომპანიისგან GDS-მა ჩვენების ექსკლუზიური უფლებით შეიძინა ფილმები და სერიალები.

გაზაფხული-ზაფხულის სეზონი GDS-ზე კრიმინალური დრამის პერიოდია.

ფარგო

ფარგო FX-ის ბოლო დროის ერთ-ერთი ყველაზე წარმატებული სერიალია. მისი პრემიერა არხზე 2014 წელს შედგა. შოუს პირველი სეზონი მთლიანად სოციოპათი და დამნაშავე ლორნ მალვოის გარშემო ვითარდება.

პირველ სეზონში მაყურებელი თვალს ადევნებს 2006 წელს მომხდარი მკვლელობების სერიას, რომელსაც პოლიცია იძიებს. მეორე სეზონში დრო იცვლება და 1979 წლის მინესოტაში ვინაცვლებთ, სადაც ქალაქ ლუვერნში მცხოვრები ცოლ-ქმარი ჩადენილი დანაშაულის კვალის დაფარვას ცდილობს. რაც შეეხება მესამე სეზონს, ის ტყუპი ძმების ისტორიას მოგვითხრობს. ორივე მათგანს ივან მაკგრეგორი ასახიერებს. ძმების მეტოქეობა ქურდობით იწყება და მკვლელობით გვირგვინდება. დანაშაულს მარტოხელა დედა გლორია იძიებს, რომელიც ამ საქმიანობის პარალელურად, ცდილობს, საკუთარი ცხოვრებაც დაალაგოს.

გაბოროტებული

გაბოროტებული ამერიკული ტელესერიალია, რომელიც ერთი ჩვეულებრივი ადამიანის ცხოვრებას მიჰყვება მასწავლებლობიდან - ნარკოდამნაშავეობამდე. სერიალი გვიჩვენებს, როგორ შეიძლება პროტაგონისტი გადაიქცეს ანტაგონისტად. მეოჯახე კაცი, ვოლტერ ვაითი აღმოაჩენს, რომ კიბო აქვს და სულ ცოტა დრო დარჩა სიცოცხლისთვის. რაკი დასაკარგი აღარაფერი აქვს, ქიმიის მასწავლებელი მეტამფეტამინის დამზადებას დაიწყებს ყოფილ მოსწავლესთან, ჯესი პინკმენთან ერთად. ეს არის სერიალი, რომელსაც თვალს ვერ მოაშორებთ.

შავი სია

სერიალი ყოფილი აგენტის, რაიმონდ რედინგტონის ამბავს მოგვითხრობს, რომელიც გადაწყვეტს, FBI-ს ჩაბარდეს.

გრეის ანატომია

გრეის ანატომია, უკვე წლებია, GDS-ის სავიზიტო ბარათია. შონდა რაიმსის მიერ შექმნილი შედევრი ახალი სეზონით დაბრუნდება ეთერში.

შავი კოდი

კიდევ ერთი სამედიცინო დრამა, რომელიც ლოს-ანჯელესის საავადმყოფოს პერსონალზე მოგვითხრობს.

ამერიკული საშინელებათა ისტორია

გრეის ანატომიის მსგავსად, ამერიკული საშინელებათა ისტორიაც დიდი ხანია რაც არხზე გადის. ახალ სეზონს სულ მალე ვიხილავთ.

ქუანტიკო

FBI-ს ახალწვეულები ვირჯინიაში ქუანტიკოს ბაზაში იწყებენ მომზადებას. თითოეულ მათგანს საკუთარი მიზანი აქვს, რის შესახებაც ფლეშბექებით შევიტყობთ, ხოლო წინ გადახტომისას 9/11-ის შემდგომ ყველაზე დიდ ტერაქტს ვიხილავთ, რომელზე პასუხისმგებელიც ერთ-ერთი ახალწვეულია.

ჰანიბალი

უილ გრეჰემი ფედერალურ ბიუროსთან ერთად სერიულ მკვლელს ეძებს. მას უნიკალური აზროვნება ეხმარება, ღრმად შეიგრძნოს სხვა ადამიანის შინაგანი განცდები. უოლს შეუძლია გაიგოს მკვლელობის მიზეზი და ის, თუ რამ გამოიწვია დანაშაული. მაგრამ როცა მას მკვლელის პოვნა უჭირს, ასეთ შემთხვევებში ის ჰანიბალ ლექტერს მიმართავს.

კრიმინალური აზროვნება

კრიმინალური აზროვნება GDS-ზე გრძელდება.

შილდის აგენტები

ABC-სა და MARVEL-ს ერთობლივი სერიალი, რომელიც Avengers-ის შემდგომ პერიოდზე მოგვითხრობს.

სიმართლის ანატომია

როცა ბრწყინვალე ნეიროქირურგის კარიერა ნაადრევად შეწყდება, ის გადაწყვეტს თავისი სამედიცინო უნარები მკვლელობების გამოძიებისთვის გამოიყენოს. ნებისმიერ გვამს თავისი ამბავი აქვს, ექიმი მეიგან ჰანტი კი მის გაგებას აპირებს.

საიდუმლოები და ტყუილები

ისტორიის ეპიცენტრში ბენია, რომელიც ყოველდღიური ვარჯიშის დროს ოთხი წლის ბავშვის გვამს იპოვის. ეს ამბავი მის ცხოვრებას თავდაყირა დააყენებს.

ხაფანგი

ელისი ლოს-ანჯელესის საუკეთესო კერძო დეტექტივია, მაგრამ მისი წარმატებული ცხოვრება ინგრევა მას შემდეგ, რაც ქმარი გაძარცვავს და გაიქცევა.

აღქმა

ექიმი დანიელ პირსი ნიჭიერი, მაგრამ ექსცენტრული ნეიროქირურგია, რომელსაც FBI განსაკუთრებით რთული საქმეების გამოძიებაში მონაწილეობის მისაღებად იწვევს.