საქართველოს საპატრიარქოს ცნობით, მცხეთაში, ჯვრის მონასტრის რეზიდენციაში ევროკავშირის კომისარი სამეზობლო პოლიტიკისა და გაფართოების საკითხებში, ოლივერ ვარჰეი ილია II-ს შეხვდა.

საპატრიარქოს ინფორმაციით, შეხვედრას, ასევე, ესწრებოდნენ საპატრიარქო ტახტის მოსაყდრე, სენაკისა და ჩხოროწყუს მიტროპოლიტი შიო (მუჯირი), ახალციხისა და ტაო-კლარჯეთის მიტროპოლიტი თეოდორე (ჭუაძე), გორისა და ატენის მიტროპოლიტი ანდრია (გვაზავა), პროტოპრესვიტერი გიორგი ზვიადაძე, საპატრიარქოს საზოგადოებასთან ურთიერთობის სამსახურის ხელმძღვანელი, დეკანოზი ანდრია ჯაღმაიძე და დელეგაციის წევრები.

როგორც საპატრიარქოში აცხადებენ, გაცნობითი ხასიათის შეხვედრაზე საუბარი ევროკავშირის მიერ საქართველოს ტერიტორიული მთლიანობის მხარდაჭერას შეეხო. მათივე ცნობით, ევროკომისარი საქართველოში 5 ივლისს ჩამოვიდა და ილია II-სთან სტუმრობამდე რამდენიმე ტაძარი, მათ შორის, მცხეთის ჯვრის მონასტერი დაათვალიერა.