Sinopharm-ის ახალ დოზაზე რეგისტრაცია დღეს 12:00 უნდა დაწყებულიყო, თუმცა მსურველებს, ამ დროისათვის [12:21], ვებ-გვერდზე არსებული ხარვეზის გამო რეგისტრაციის გავლა არ შეუძლიათ. პორტალზე, booking.moh.gov.ge, სადაც დოზის დაჯაშვნა ხდება წერია: "გაცნობებთ, რომ მიმდინარეობს ტექნიკური განახლება. ბოდიშს გიხდით დროებითი შეფერხებისთვის".

On.ge-მ დაავადებათა კონტროლის ეროვნულ ცენტრის პრესსამსახურს ჰკითხა, თუ რამ გამოიწვია შეფერხება და როდის მოხდება პრობლემის აღმოფხვრა, რაზეც, ჯერჯერობით, ვერ გვპასუხობენ.

აღსანიშნავია, რომ პორტალს რეგისტრაციის დროს მსგავსი პრობლემები აქამდეც არაეთხელ შექმნია.

საქართველოში ჩინური ვაქცინების, Sinopharm-ისა და Sinovac-ის მილიონი დოზა გუშინ, 2 ივნისს ჩამოვიდა. პრემიერმინისტრის, ირაკლი ღარიბაშვილის განცხადებით, იგეგმება, რომ დღეში 20-25 000 აცრა ჩატარდეს.

საქართველოში კორონავირუსზე ვაქცინაცია 15 მარტს დაიწყო. ბოლო მონაცემებით, სულ აცრილია — 266 161 ადამიანი, დღიურად — 1 246.