ბოსტნეულსა და ბაღჩეულში ნიტრატების შემცველობის 16 დარღვევა გამოვლინდა, საიდანაც უმეტესობა ჭარხალშია. სურსათის ეროვნული სააგენტოს ინფორმაციით, შემოწმებულ საზამთროსა და ნესვში დარღვევა არ აღმოუჩენიათ.

უწყების განცახდებით, მთელი ქვეყნის მასშტაბით მსხვილი და მცირე სარეალიზაციო ობიექტებიდან იმპორტირებული და ადგილობრივი პროდუქტის 100 ნიმუში შეამოწმეს. ლაბორატორიული კვლევის შედეგად კი გამოვლინდა 16 დარღვევა. მათივე ინფორმაციით, ვინაიდან უმეტესად ნიტრატის შემცველობა ჭარხალში იყო მომატებული, ეს პროდუქტი გამოითხოვეს, აიკრძალა რეალიზაცია და სურსათის ბაზარზე განთავსება.

როგორც სააგენტოს უფროსის მოადგილე, ვასილ ბასილაძე, განმარტავს, გაზრდილი მოთხოვნიდან გამომდინარე, სააგენტო სეზონურად ამოწმებს ნიტრატების შემცველობას სხვადასხვა ბოსტნეულში. მისივე თქმით, გააქტიურებული კონტროლის, აგრეთვე ფერმერებისა და ბიზნესოპერატორების ინფორმირებულობის გაზრდის შედეგად, დარღვევები შემცირებულია, თუმცა აღინიშნება ცალკეული შეუსაბამობები და სააგენტო, მომხმარებლის ინტერესების დაცვის მიზნით, შესაბამის ღონისძიებებს ატარებს.