ენერგეტიკისა და წყალმომარაგების მარეგულირებელი კომპანიის ინფორმაციით, გაზგამანაწილებელი მცირე კომპანიების ტარიფები კორექტირდა, რაც იმას ნიშნავს, რომ სენაკსა და თბილისის რამდენიმე უბანში ბუნებრივი აირის ტარიფი იზრდება.

28 ივნისს სემეკმა საჯარო სხდომაზე იმსჯელა ბუნებრივი გაზის გამანაწილებელი მცირე კომპანიების შპს გასკოს, რომელიც ოპერირებს სენაკში, შპს ვარკეთილაირის, რომელიც ოპერირებს ვარკეთილში, სს ენერგოკავშირის, რომელიც ოპერირებს გლდანისა და მუხიანის რამდენიმე მიკრორაიონში, ბუნებრივი გაზის მიწოდებისა და მოხმარების ტარიფების კორექტირებაზე.

შპს გასკო სენაკის 9000-მდე აბონენტს ემსახურება, შპს ვარკეთილაირი ვარკეთილის 16000-მდე აბონენტს, სს ენერგოკავშირი კი გლდანისა და მუხიანის 120000-მდე აბონენტს.

კომისიის გადაწყვეტილებით, სენაკის მოსახლეობას გაზი 5,05 თეთრით უძვირდება, ვარკეთილის მოსახლეობას, 8,385 თეთრით, გლდანისა და მუხიანის რამდენიმე მიკრორაიონის მოსახლეობას კი 8,351 თეთრით.

სემეკის ინფორმაციით, კორექტირებული ტარიფები ძალაში შევა პირველი ივლისიდან და იმოქმედებს 2022 წლის 31 დეკემბრის ჩათვლით.