თვითმმართველობის 2021 წლის არჩევნებზე გირჩს მერობისა და მაჟორიტარობის კანდიდატები არ ეყოლება. ამის შესახებ პარტიის ოფისში გამართულ პრესკონფერენციაზე ისაუბრეს.

როგორც პარტიის ერთ-ერთმა წევრმა, ჰერმან საბომ თქვა, გირჩი საკრებულოებში პარტიულ სიას წარადგენს, რომელიც შიდა პრაიმერიზით გამოვლინდება. გარდა ამისა, პრესკონფერენციაზე საარჩევნო კამპანიის ხელმძღვანელი და "გირჩის სამეფოს" თავკაცი, ოთო ზაკალაშვილი წარადგინეს.

პარლამენტის დეპუტატი, ვახტანგ მეგრელიშვილი ამბობს, რომ შემოდგომაზე დაგეგმილი არჩევნები მათთვის "საპარლამენტო არჩევნებია".

"ჩემი, სანდროსი, იაგოს ლეგიტიმაციის არჩევნებია და ბუნებრივია, რომ ჩვენ გვსურს ამ არჩევნებზე მივაღწიოთ წარმატებას, ანუ მინიმუმ გავიმეოროთ ის შედეგი, რომელიც გვქონდა. პარლამენტარებს გვქონდეს განცდა, რომ ლეგიტიმურად ვზივართ და ლეგიტიმურად ვლაპარაკობთ იმას, რასაც ვლაპარაკობთ შემდეგი წლების განმავლობაში", — თქვა მეგრელიშვილმა.

გარდა ამისა, ჰერმან საბომ აღნიშნა, რომ თვითმმართველობის არჩევნებს ორი ფუნქცია აქვს — გირჩის შენარჩუნებისა და პროგრესის.

"შენარჩუნების იმიტომ, რომ იცით, 2020 წლის არჩევნების შემდეგ გირჩი გაიყო შუაზე და ძალიან არასასიამოვნოა, როცა მეუბნებიან, რომ ის ადგილები, რომელიც თქვენ გაქვთ, არის, ვთქვათ, ჯაფარას [ზურაბ ჯაფარიძის] რეიტინგით ან არ გეკუთვნოდათ და ა.შ. რა თქმა უნდა, ბოლო კვლევები გვიჩვენებს, რომ ეს მთლად ასე არ არის. პროგრესი სახეზეა, რეიტინგი არ დაგვეკარგა, მაგრამ იმისათვის, რომ ჩვენ მართლა მყარად შეგვეძლოს საუბარი ჩვენი ამომრჩევლის სახელით, ძალიან გვჭირდება ეს თვითმმართველობის არჩევნები, სულ მცირე ძველი შედეგის გამეორება", — განაცხადა საბომ.

რაც შეეხება პროგრესის ნაწილს, საბო ამბობს, რომ პარტიას ბევრი კარგი იდეა აქვს, რომელიც არ ხორციელდება, რადგან ადამიანებს არ აქვთ განცდა, რომ ამას სერიოზულად ამბობენ:

"რაღაცნაირად ზურგი არ გვაქვს. მაგრამ პარლამენტში მოხვედრის შემდეგ ზურგი გამყარდა და ჩვენს სიტყვას სხვა წონა შეეძინა, მაგრამ გირჩის სამეფოს ყველა სტრუქტურაში შეჟონვა და ექსპანსია არის ჩვენი მიზანია ამ არჩევნებზე".

საარჩევნო კამპანიის ხელმძღვანელი, ოთო ზაკალაშვილი აცხადებს, რომ გირჩი დღეიდან აქტიურ წინასაარჩევნო კამპანიაზე გადადის. ერთ-ერთი სიახლე ისაა, რომ პარტიის მიერ შექმნილი ციფრული ვალუტა — ქართული დოლარი, იგივე ჯედი კრიპტოვალუტა გახდება, რაც საშუალებას მისცემთ, გავიდნენ გლობალურ ბაზარზე და "მისწვდნენ სხვა ქვეყნების ლიბერტარიანელებს".

გარდა ამისა, პარტიაში განმარტავენ, რომ შეიცვლება შიდა პრაიმერიზის ჩატარების წესიც. ახალი ალგორითმით, გირჩის ქრიპტოვალუტა ჯედი "მაქსიმალური ეფექტურობით" დაიხარჯება.