იმის გამო, რომ ჩრდილოეთ კორეის ლიდერმა კიმ ჩენ ინმა წონაში დაიკლო, ადგილობრივები დამწუხრებულები არიან. ფხენიანის არაიდენტიფიცირებული მოქალაქის სიტყვებს კონტროლირებადი მედია გადმოსცემს, რომლის მიხედვითაც, ჩრდილო კორეის მცხოვრებლებს კიმ ჩენ ინის ახალმა კადრებმა გული გაუტეხა.

37 წლის კიმ ჩენ ინი ცოტა ხნის წინ სახელმწიფო მედიის მიერ გამოქვეყნებულ ვიდეოში გამოჩნდა, რომელშიც ის შესამჩნევად გამხდარი ჩანს.

კიმ ჩენ ინი 2020 წლის ივლისში და 2021 წლის ივნისში

"პატივცემული გენერლის ასე დანახვამ ჩვენს ხალხს გული გაუტეხა, ყველას ცრემლები გვიდგას თვალებში", — ამბობს ადგილობრივი KRT-სთან საუბრისას.

კიმ ჩენ ინი ქუჩაში არსებულ დიდ ეკრანებზე ფხენიანის მოქალაქეებმა იხილეს, როდესაც დიქტატორი პარტიის ოფიციალურ პირებთან ერთად კონცერტს ესწრებოდა. უცნობია, რამ გამოიწვია ჩრდილოეთ კორეის მმართველის გარეგნობის ცვლილება. მანამდე, ის 1 თვის განმავლობაში კამერებთან არ ჩნდებოდა.

გასული წლის დასაწყისში კიმ ჩენ ინის ჯანმრთელობის პრობლემების შესახებ პირველი ცნობები გავრცელდა, მას შემდეგ, რაც მან დიქტატორული რეჟიმის დამაარსებლის, კიმ ირ სენის იუბილე გამოტოვა.