ვამპირებზე დაწერილი ერთ-ერთი ყველაზე საკულტო ისტორია სულ მალე ახლებურად გაცოცხლდება!

ოფიციალურად დადასტურდა, რომ ენ რაისის რომანის ინტერვიუ ვამპირთან მიხედვით სერიალის გადაღებაზე მუშაობენ. მთელ მსოფლიოში მილიონობით მაყურებელი ამ სახელწოდებით უკვე კარგად იცნობს 1994 წლის ფილმს, რომელშიც მთავარ როლებს ბრედ პიტი, ტომ კრუზი, კრისტენ დანსტი და ანტონიო ბანდერასი ასრულებენ.

მომავალ სერიალს ტელეკომპანია AMC გადაიღებს, აღმასრულებელი პროდიუსერი კი მარკ ჯონსონი იქნება, რომელსაც აქამდე ისეთ ცნობილ პროექტებზე უმუშავია, როგორებიცაა Breaking Bad (მძიმე დანაშაული) და Better Call Saul (უმჯობესია, სოლს დაურეკოთ).

კადრი ფილმიდან ინტერვიუ ვამპირთან.

ფოტო: Warner Bros.

ინტერვიუ ვამპირთან ამერიკელი მწერლის ენ რაისის 1976 წელს გამოქვეყნებული გოთიკური რომანია, რომელიც წიგნების სერიის ვამპირის ქრონიკები ნაწილია. ამ სერიის ფარგლებში, რომელიც 15 წიგნს აერთიანებს, მწერალს დღემდე 80 მილიონზე მეტი ეგზემპლარი აქვს გაყიდული მთელ მსოფლიოში.

AMC-მ ამჟამად სერიალის ერთ სეზონზე დაიწყო მუშაობა, რომელშიც რვა ეპიზოდი იქნება, თუმცა უფლებები ენ რაისის წიგნების მთელ სერიაზე მოიპოვა, შესაბამისად, ისტორიის გაგრძელებსაც უნდა ველოდოთ.

ჯერ უცნობია, ვინ შეასრულებს მთავარ როლებს ახალ სერიალში, მაგრამ ვიცით, რომ შოუს პრემიერა 2022 წელს შედგება.