ოკუპირებული ცხინვალის ციხეში უკანონო პატიმრობაში მყოფი ზაზა გახელაძის ცოლი, ირმა ბუთხუზი აცხადებს, რომ ოჯახი ხელისუფლებას სამოქმედო დროს კიდევ აძლევს.

"ჩვენ არაფერს არ ვთმობთ. პირიქით, ხელისუფლებას ვაძლევთ სამოქმედო დროს კიდევ, რომ რაც შეიძლება მოკლე ხანში მოხდეს გათავისუფლება", — ამბობს ირმა ბუთხუზი.

დღეს ზაზა გახელაძეს დაბადების დღეს სოფელ ქვემო ჭალაში საპროტესტო მსვლელობა გაიმართა. ისინი მთავრობისგან ქმედითი ნაბიჯების გადადგმას მოითხოვენ.

შექმნილი მდგომარეობისა და ცოლის თვითმკვლელობის მცდელობის გამო ოჯახი აქციების გამართვასთან ერთად საოკუპაციო ხაზს იქეთ გადასვლას გეგმავდა. თუმცა 23 მაისს ზაზა გახელაძის მამამ, მიშა გახელაძემ განაცხადა, რომ გადაწყვეტილება პატრიარქისა და ოჯახის თხოვნის შემდეგ შეცვალეს.

11 ივლისს ერთი წელი გავა მას შემდეგ, რაც ზაზა გახელაძე რუსმა სამხედროებმა დაატყვევეს. ის კასპში ჯერ ცეცხლსასროლი იარაღით დაჭრეს, შემდეგ კი გაიტაცეს. რუსული მხარის მტკიცებით, გახელაძემ ცეცხლი პირველმა გახსნა. თუმცა, რადიო თავისუფლების ინფორმაციით, სასამართლო პროცესზე ერთ-ერთმა მოწმემ თქვა, რომ ზაზა გახელაძეს დამიზნებით არ უსვრია.

გახელაძეს დე ფაქტო ხელისუფლებამ ბრალი წაუყენა რუსეთის სისხლის სამართლის კოდექსის ორი მუხლით — "სიცოცხლის ხელყოფის მცდელობა" და "სახელმწიფო საზღვრის უკანონოდ გადაკვეთა".

ოკუპირებული ცხინვალის ე.წ. სასამართლომ მას 5 თებერვალს 12 წლითა და 6 თვით უკანონო პატიმრობა მიუსაჯა.

გაიგეთ მეტი: