სახელმწიფო უსაფრთხოების სამსახურმა კოვიდის პირობებში 200-ლარიანი დახმარების მოტყუებით მიღების ორგანიზების ბრალდებით 3 ადამიანი დააკავა. ამის შესახებ ინფორმაციას ანტიკორუფციული სააგენტო ავრცელებს. უწყებაში აღნიშნავენ, რომ დაკავებულები ორგანიზებას უწევდნენ ათობით ადამიანისთვის დახმარების მოტყუებით მიღებას და აქედან ე.წ. ატკატებს იღებდნენ.

სუს-ის ინფორმაციით, დაკავებულებმა რამდენიმე ათეული ადამიანისთვის ყალბი დოკუმენტები დაამზადებინეს, რომლის მიხედვითაც, ისინი ამ კონკრეტულ ინდ.მეწარმესთან იყვნენ დასაქმებულები, შემდეგ კი ეს მონაცემები ფინანსთა სამინისტროში წარადგინეს, რის შედეგადაც, დახმარება მიიღეს. უწყებაში ამბობენ, რომ ბრალდებულები თაღლითურად დაეუფლნენ სახელმწიფოს კუთვნილ 10 200 ლარს.

"დადგენილია, რომ აღნიშნული პირები რეალურად არ იყვნენ დასაქმებული ინდ. მეწარმესთან და შესაბამისად, არ წარმოადგენდნენ საქართველოს მთავრობის განკარგულებით განსაზღვრულ დასახმარებელ პირთა წრეს", — აღნიშნავენ სუს-ში.

უწყებაში ამბობენ, რომ ეს ადამიანები, გაცემული 200-ლარიანი დახმარებიდან 100 ლარს ე.წ. "ატკატის" სახით იღებდნენ.

მათივე ინფორმაციით, თაღლითურ სქემაში მონაწილე ყველა პირი იდენტიფიცირებულია და მათ მიმართ სათანადო საგამოძიებო და საპროცესო მოქმედებები ტარდება. გამოძიება წინასწარი შეთანხმებით ჯგუფის მიერ დიდი ოდენობით თაღლითობის მუხლით მიმდინარეობს.