ევროპული საქართველოს ლიდერი, გიგა ბოკერია აცხადებს, რომ რუს ბიზნესმენს, სერგეი ბოკარევს, რომელიც რუსეთში იდევნება, საქართველოდან ექსტრადიცია ემუქრება. ბოკერიას თქმით, "ბიზნესმენი რუსეთში თაღლითობის მუხლით იყო დაკავებული, რაც რუსეთში არასასურველი ბიზნესმენების წინააღმდეგ ტრადიციული მეთოდია".

პარტიის ოფისში გამართულ ბრიფინგს გიგა ბოკერიასთან და ადვოკატ მალხაზ პატარაიასთან ერთად თავად ბოკარევიც ესწრებოდა.

ბოკერიას განცხადებით, რუსეთის ფედერაციის მიერ სერგეი ბოკარევის დევნის მიზეზი რუსი ოპოზიციონერის, ალექსეი ნავალნის ორგანიზაციის ღია ფინანსური მხარდაჭერა და რუსული პოლიტიკის კრიტიკაა, მათ შორის საქართველოსა და უკრაინასთან მიმართებაშიც.

"არ არის მოულოდნელი, რომ ამას მის ბიზნესში ჯერ ფინანსური პრობლემები მოჰყვა. შემდეგ მოწოდება, რომ საჯაროდ უარეყო თავისი პოზიცია და შეერთებოდა ერთიანი რუსეთის მხარდამჭერთა საჯარო კოლექტივს. მისგან მაგალითის შექმნა უნდოდათ, როგორ განუდგა "ცუდ" პოზიციებს და როგორ დადგა "სწორზე". ხოლო მას შემდეგ რაც მან ამ ყველაფერზე უარი განაცხადა, მის წინააღმდეგ სისხლის სამართლებრივი დევნა დაიწყო", — განაცხადა ბოკერიამ.

რუსეთში აღკვეთის ღონისძიების სახით გირაოს გადახდის შემდეგ ბოკარევი საქართველოში ჩამოვიდა.

"საქართველოში ჩამოსვლის შემდეგ, 2018 წელს მას ჯერ აკავებენ 9 თვე ამყოფებენ წინასწარი დაკავების საკანში, რუსეთის მხრიდან მოთხოვნის საფუძველზე და ამის შემდეგ, როდესაც პირველი ინსტანციის სასამართლოში მას უარი ეთქვა თავშესაფრის მიღებაზე, დღესაც საქართველოს მთავრობა აგრძელებს მის დევნას და ხვალ არის მისი სასამართლო. წარმატების შემთხვევაში ჩვენი ხელისუფლების მხრიდან ბოკარევს ექსტრადირება და პუტინის რუსეთის ხელში გადაცემა ემუქრება", — აცხადებს ევროპული საქართველოს ლიდერი.

სერგეი ბოკარევმა აღნიშნა, რომ რუსეთში მას 99%-იანი შანსი აქვს, რომ სასამართლო გაამტყუნებს და 10 წლამდე პატიმრობას მიუსჯის. ციხეში კი მას წამება, ძალადობა, და არაადამიანური მოპყრობა ემუქრება. ბიზნესმენის უფლედამცველის, მალხაზ პატარაიას თქმით, საქართველომ ბოკარევს სამართლებრივად თავშესაფარი უნდა მისცეს.

რუსი ბიზნესმენის საქმესთან დაკავშირებით On.ge შინაგან საქმეთა სამინისტროს მიგრაციის სამსახურს დაუკავშირდა. მათ პასუხს მიღებისთანავე შემოგთავაზებთ.