მას შემდეგ, რაც კრიშტიანუ რონალდუმ 14 ივნისს კონფერენციაზე კოკა-კოლას ბოთლები წყლით ჩაანაცვლა, მსგავსი რამ გაიმეორა კიდევ ერთმა ფეხბურთელმა, მანუელ ლოკატელიმაც.

ამ 23 წლის იტალიელმა ნახევარმცველმა ევროპის ჩემპიონატის ფარგლებში გამართულ ერთ-ერთ კონფერენციაზე კოკა-კოლას ბოთლები გვერდით გადადო და წყალი დაიდგა წინ.

პირველად მსგავსად პორტუგალიის ეროვნული ნაკრების წევრი და კაპიტანი, კრიშტიანუ რონალდუ მოიქცა, რამაც კოკა-კოლას აქციების ფასი 4 მილიარდი დოლარით გააუფასურა: მსოფლიოში ერთ-ერთმა ყველაზე ცნობილმა ფეხბურთელმა ყველას წყლის დალევისკენ მოუწოდა, რის შემდეგაც კომპანიის ღირებულება $242 მილიარდიდან $238 მილიარდამდე დაეცა.

ამ ფაქტს გამოეხმაურა ქართველი ბიზნესმენი თემურ ჭყონია და სპორტსმენი გააკრიტიკა:

"ვითომ მაგარია, რონალდუ გამოვიდა და კონკურენტების წყალი დალია, ვითომ მაგარია. მე ვფიქრობ, რომ იცი რა, ხეპრე ფეხბურთელის ჟესტი იყო...", — განაცხადა მან.

აღსანიშნავია, რომ კოკა-კოლა ევროპის ჩემპიონატის ერთ-ერთი მთავარი სპონსორია.