ვიქტორიის შტატში, გიპსლენდის რაიონის რამდენიმე ქალაქში ნამდვილი ობობების აპოკალიფსი მძვინვარებს. როგორც აღმოჩნდა, აღნიშნული მოვლენა იშვიათობა სულაც არაა და სტიქიით, კერძოდ, წყალდიდობითაა გამოწვეული.

ივნისში ვიქტორიის შტატში მოსალოდნელი წყალდიდობის გამო მოსახლეობის ნაწილის ევაკუაცია მოხდა. სტიქიისგან თავის დაღწევა ადამიანების გარდა, ობობებმაც გადაწყვიტეს. ობობების ქსელში ქალაქები სწორედ წყალდიდობის შემდეგ გაეხვა.

ფოტო: CAROLYN CROSSLEY

"ეს წყალდიდობის შემდეგ გავრცელებული ფენომენია. ძლიერი წვიმისა თუ წყალდიდობის დროს მიწაზე მცხოვრები ცხოველები იქ არსებობას ვეღარ აგრძელებენ, ამიტომ ზუსტად იმას ცდილობენ, რასაც ჩვენ ვცდილობთ: საცხოვრებლად უფრო მაღალ ადგილს ირჩევენ", — აცხადებს სიდნეის უნივერსიტეტის ერთ-ერთი პროფესორი და ეკოლოგი.

ფოტო: CAROLYN CROSSLEY

მელბურნის მუზეუმის ეტიმოლოგიის მიმართულების უფროსი კურატორის, კენ უოკერის განცხადებით, მიწაზე მობინადრე ობობებმა წყალდიდობისგან თავის დასაღწევად ქსელი ერთდროულად გააბეს. ამ ხერხს ობობები ასაფრენად და გადასაადგილებლად იყენებენ. უოკერის თქმით, ამგვარად მათ 100 კილომეტრის გავლაც კი შეუძლიათ. აღსანიშნავია ისიც, რომ თითოეულ არსებას მხოლოდ თითო "ძაფი" ეკუთვნის, შესაბამისად ამ საოცარი "საბნის" მოქსოვაში მილიონობით ობობა მონაწილეობდა.

საოცარმა ფოტოებმა ინტერნეტსივრცეში საზოგადოების ნაწილის შეშინება გამოიწვია, თუმცა კენ უოკერი მათ არწმუნებს, რომ აღნიშნული ფენომენი ობობების რაოდენობის ზრდაზე არ მიუთითებს და ეს მხოლოდ წყალდიდობით გამოწვეული ბუნებრივი მოვლენაა. აბლაბუდის ავტორები Ambicodamus სახეობის წარმომადგენლები არიან. უოკერის თქმით, აღნიშნული სახეობა შხამიანი არაა და ადამიანებისთვის საფრთხეს არ წარმოადგენს.

კენ უოკერმა აღნიშნა, რომ აბლაბუდა საკმაოდ ფაქიზია და ადამიანებს ურჩია, საოცარი სანახაობით დატკბობა მოესწროთ.