ჯანდაცვის მინისტრის მოადგილის, თამარ გაბუნიას განცხადებით, ივლისიდან ვაქცინაციის პროგრამის გაფართოება მოხდება როგორც თბილისში, ასევე, რეგიონებში იმ დოზების ხარჯზე, რომელთა მიღებასაც ქვეყანა ელოდება ზაფხულის პერიოდში და, ასევე, შემდეგ. მისივე თქმით, ვაქცინაცია სავაჭრო ცენტრებშიც იქნება შესაძლებელი.

"პირველი და ყველაზე მნიშვნელოვანი მომენტი აქ იქნება ვაქცინაციის ადგილების შექმნა და ბრიგადების დამატება სამედიცინო დაწესებულებების და ასევე, საზოგადოებრივ ცენტრებში ვაქცინაციის ცენტრების მოწყობის ხარჯზე. ჯამურად დღეს ქვეყნის მასშტაბით მოქმედებს 200-მდე ბრიგადა, დამატებით კიდევ საჭიროა თითქმის ამდენივეს მობილიზება. ჩვენ უკვე გვაქვს დაწყებული კონსულტაციები მოლებთან", — განაცხადა გაბუნიამ.

მინისტრის მოადგილის თქმით, ასევე, გამონახულია დიდი სივრცეები, სადაც სამედიცინო დაწესებულებები თავად აიღებენ პასუხისგმებლობას ვაქცინაციის სივრცის მოწყობაზე და იქ ჩაატარებენ ვაქცინაციას იმ პირებისთვის, ვინ მივა და მიმართავს დაწესებულებას.