საქართველოს საგარეო საქმეთა მინისტრის, დავით ზალკალიანის განცხადებით NATO-ს ბრიუსელის სამიტზე საქართველოს საკითხზე იმსჯელებენ.

"საქართველოს თემატიკა ნატოს პრიორიტეტულ დღის წესრიგში ყველა მიმართულებით განიხილება, სწორედ იმ ღირებულებებთან და ფასეულობებთან შესაბამისობაში, რომელსაც ეფუძნება დღევანდელი საერთაშორისო დღის წესრიგი. ყურადღება გამახვილდება იმ პრობლემებზე, რაც არის დაკავშირებული ჩვენი ქვეყნის ოკუპაციასთან. დარწმუნებული ვარ, რომ დეკლარაციაში ასახული იქნება შესაბამისი შეფასება, ასევე იქნება მოწოდება რუსეთის ფედერაციის მიმართ, რომ მან მტკიცედ დაიცვას საერთაშორისო სამართლის ნორმები და ის აღებული საერთაშორისო ვალდებულენები, რაც არის დაკავშირებული 2008 წლის ცეცხლის შეწყვეტის შეთანხმებასთან", — აცხადებს მინისტრი.

პოლონეთის პრეზიდენტის, ანდჟეი დუდას განცხადებით, 14 ივნისს NATO-ს სამიტზე ალიანსში უკრაინის გასაწევრიანებლად საჭირო "საგზაო რუკის" საკითხს განიხილავენ. უკრაინული მედიის ინფორმაციით, ამის შესახებ დუდამ ვოლოდიმირ ზელენსკისთან ერთად გამართულ ბრიფინგზე განაცხადა.