სოფელ შუქრუთის მცხოვრებლებმა ერთთვიანი შიმშილობის შემდეგ პროტესტი შეწყვიტეს. როგორც ერთ-ერთმა მოშიმშილემ, გიორგი ნეფარიძემ On.ge-ს უთხრა ამის მიზეზი კომპანია ჯორჯიან მანგანეზთან მიღწეული შეთანხმება გახდა. ამჟამად ისინი აშშ-ს საელჩოსთანაც აღარ იმყოფებიან.

"დავთანხმდით კომპანიის შეთავაზებას. შევთანხმდით, რომ ზიანის ანაზღაურება განხორციელდება არსებული მოდელით და ასევე შევთანხმდით, რომ ზიანის შეფასებას ლევან სამხარაულის სახელობის სასამართლო ექსპერტიზის ბიურო უზრუნველყოფს", — ამბობს გიორგი ნეფარიძე.

მისივე თქმით, შეთანხმებით კმაყოფილნი არიან. რაც შეეხება ჯანმრთელობის მდგომარეობას, ნეფარიძე აღნიშნავს, რომ მათ რეაბილიტაცია დასჭირდებათ.

"გვესაჭიროება საავადმყოფოში რამდენიმე კურსი. ზუსტად 31-ე დღე გახდა, რაც ვშიმშილობთ და სუსტად ვგრძნობთ, რა თქმა უნდა, თავს", — აღნიშნავს ნეფარიძე.

სოფელ შუქრუთის მოსახლეობა აცხადებს, რომ კომპანია ჯორჯიან მანგანეზის სამუშაოების გამო მათი კარგ-მიდამო ინგრევა, რის გამოც ზიანის ანაზღაურებას ითხოვენ. პირობების დაკმაყოფილების მოთხოვნით მათ საპროტესტო აქციები ჯერ კიდევ 2019 წელს დაიწყეს. პროტესტი შეწყდა, როცა კომპანიის წარმომადგენლები დაზიანებული სახლების კომპენსაციის გადახედვას დაჰპირდნენ.

ამის შემდეგ შუქრუთის მოსახლეობამ პროტესტი 2020 წლის თებერვალში განაახლა. მოთხოვნები ისევ იგივე იყო. ჯორჯიან მანგანეზის მფლობელობაში არსებული მაღაროების ფუნქციონირება მათ კვლავ შეაჩერეს.

ადგილობრივებმა პროტესტის უკიდურეს ფორმასაც მიმართეს — 8 ადამიანმა, მათ შორის სამმა ქალმა შიმშილობა გამოაცხადა და პირი ამოიკერა. 30 მაისს ისინი თბილისში ჩამოვიდნენ და აშშ-ს საელჩოსთან მივიდნენ, რათა ხელისუფლებისა და კომპანიის ყურადღება მიექციათ. ოთხ დღეში კი შუქრუთელები მშრალ შიმშილობაზე გადავიდნენ.

ამავე თემაზე: