ნაციონალური მოძრაობის ერთ-ერთი წევრის, თინა ბოკუჩავას განცხადებით, ამნისტიის კანონპროექტის მოსმენა დღეს ქართულმა ოცნებამ იმიტომ გადადო, რომ მმართველი პარტიის დეპუტატს, ანრი ოხანაშვილს "შეეშინდა".

"ამნისტიის კანონპროექტის განხილვა გადადეს, სავარაუდოდ იმიტომ, რომ ძალიან შეეშინდა ბატონ ოხანაშვილს, რომ ნიკა მელიას პირველი გამოსვლა პლენარულ სხდომაზე იქნებოდა სწორედ ამნისტიის კანონზე. გასაგებია ეს ყველაფერი, რომ ფორმალურად უმრავლესობაში არიან და ამიტომ გამოიყენეს და ამით შეცვალეს დღის წესრიგი, მაგრამ არაუშავს, პოლიტიკური გამოსვლის შესაძლებლობა მაინც გვექნება და მელია გააკეთებს დღეს მთავარ განაცხადს იმასთან დაკავშირებით, თუ რა გეგმები აქვს და როგორ ხედავს ენმ საკუთარ ფუნქციას ამ პარლამენტში", — თქვა მან.

ამნისტიის კანონპროექტის მოსმენა ნაციონალური მოძრაობის სხდომაზე არყოფნის გამო გადაიდო. აღნიშნული ინიციატივა ქართული ოცნების დეპუტატმა, მამუკა მდინარაძემ წამოაყენა, რასაც პარლამენტში მყოფი დეპუტატები ერთხმად დაეთანხმნენ.

ნაციონალური მოძრაობა პარლამენტში მივიდა. პარტიის წევრებმა დღეს, 8 ივნისს პარლამენტში მისვლა დააანონსეს, თუმცა მე-10 მოწვევის პარლამენტის საგაზაფხულო სესიის პლენარულ სხდომაზე არ გამოცხადებულან. ისინი საკანონმდებლო ორგანოში სხდომის შესვენების დროს მივიდნენ.

ამასთან, 7 ივნისს პარლამენტში ერთიანი ნაციონალური მოძრაობა — გაერთიანებული ოპოზიცია ძალა ერთობაშიას ფრაქცია შეიქმნა, როლმელსაც ხატია დეკანოიძე უხელმძღვანელებს. ფრაქცია 32 წევრისგან შედგება.

30 მაისს პარტიამ საკანონმდებლო ორგანოში შესვლის გადაწყვეტილება მიიღო. მიუხედავად ამისა, ენმ შარლ მიშელის დოკუმენტს ხელს არ მოაწერს. გადაწყვეტილება პოლიტსაბჭოს შემდეგ გახდა ცნობილი. იმავე დღეს საქართველოში ევროკავშირისა და ამერიკის შეერთებული შტატების საელჩოებმა განცხადება გაავრცელეს, სადაც აღნიშნეს, რომ ნაციონალური მოძრაობის პარლამენტში შესვლის გადაწყვეტილებას მიესალმებიან, მაგრამ წუხან ევროპული საბჭოს პრეზიდენტის, შარლ მიშელის დოკუმენტზე ხელის არმოწერის გამო.