პირველ ივნისს, ბავშვთა საერთაშორისო დღეს, ეროვნული ბიბლიოთეკის მოძრაობა ეკვილიბრიუმი მარნეულის მუნიციპალიტეტის სოფელ ქურთლარის აზერბაიჯანულ სკოლას ესტუმრა და საჩუქრად კომპიუტერი და წიგნები გადასცა. მოსწავლეებისთვის, რომლებიც ქართულს მონდომებით სწავლობენ, ქართულენოვანი წიგნებით ბიბლიოთეკის შევსება განსაკუთრებით სასიხარულო იყო.

"არაქართულენოვანი სკოლების პროფესიული მხარდაჭერის პროგრამის ფარგლებში უკვე მე-11 წელია ამ სკოლაში ქართულს ვასწავლი. არამხოლოდ მოსწავლეები, პედაგოგებიც დაინტერესებულნი არიან ამ ენის შესწავლით. ეს მნიშვნელოვანია იმისთვის, რომ მათ ამ ქვეყნის სრულფასოვან მოქალაქეებად იგრძნონ თავი. ეს სოფელი და სკოლა სახელმწიფოსგან გრძნობს მხარდაჭერას. სექტემბრიდან სკოლა სრულიად ახალ, ევროპული სტანდარტებით მოწყობილ შენობაში გადადის. გიორგის მხარდაჭერა განსაკუთრებულად მნიშვნელოვანი იყო, რადგან ეროვნული ბიბლიოთეკის დირექტორი რომ უჭერს მხარს არაქართულენოვანი სკოლის განვითარებას, ამას სხვა მნიშვნელობა აქვს. ბავშვებს ძალიან გაუხარდათ მისი სტუმრობა. სკოლას 50-მდე წიგნი გადმოეცა, რომელიც სექტემბრიდან ახალ ქართულ ბიბლიოთეკაში დაიდებს ბინას. გვინდა, მოვაწყოთ ქართული ენის კაბინეტიც და სამკითხველოც. წიგნები ბავშვების ცოდნის დონის და ინტერესების შესაბამისად არის შერჩეული, რისთვისაც მადლობას ვუხდით ეკვილიბრიუმის მთელ გუნდს. არც კომპიუტერი ჰქონდათ ბავშვებს მათი მოხმარებისთვის და ესეც ძალიან ძვირფასი საჩუქარია მათთვის", — ამბობს ქურთლარის აზერბაიჯანული სკოლის ქართული ენის მასწავლებელი ნინო წიკლაური.

"სოფელ ქურთლარში ჩავედით — ახალი კომპიუტერი ჩავიტანეთ და ჩვენს ეთნიკურად აზერბაიჯანელ პატარა თანამოქალაქეებს ქართული ბიბლიოთეკა მოვუწყვეთ. ამჯერად კომპანია #ნეოგაზი დაგვეხმარა", — განაცხადა ეროვნული ბიბლიოთეკის დირექტორმა, გიორგი კეკელიძემ.