ჭყონდიდის მიტროპოლიტი პეტრე პროკურატურაში დაკითხვაზე რამდენიმე წუთის წინ შევიდა. მანამდე მან ჟურნალისტების კითხვებს უპასუხა და განმარტა, რომ ის დაკითხვაზე მისი საჯარო განცხადებებიდან გამომდინარე დაიბარეს:

"საჯარო განცხადებები, რაც გავაკეთე, რაც ხმა ავიმაღლე უსამართლობის წინააღმდეგ, პროკურატურას გაუჩნდა შეკითხვები ჩემს მიმართ. მე მზად ვარ ნებისმიერ წინააღმდეგობას, ჩემი პოზიციის წინააღმდეგ აღძრულს, და განსაცდელს შევხვდე ღირსეულად".

მიტროპოლიტი ასევე აცხადებს, რომ იგი პროკურატურას არ ენდობა:

"გიორგი მამალაძის მიმართ უდანაშაულობის პრეზუმფციისა და სხვა დარღვევებიდან გამომდინარე, რა თქმა უნდა პროკურატურა ნდობას არ იმსახურებს.

როცა მე ვსაუბრობ საპატრიარქოს დე-ფაქტო მმართველის ჩრდილოვან მმართველობაზე და მის რუხ კარდინალობაზე, იმედის ეთერში ჟურნალისტმა მკითხა, თუ რა გამოდის პროკურატურასაც ჩრდილოვანი მმართველი მართავსო? მიუხედავად იმისა, რომ შემეძლო ძალიან საინტერესო ფაქტი მომეყვანა, თავი შევიკავე, თუმცა დღეს გამოჩნდება საპატრიარქოს ჩრდილოვანი მმართველობა და ისიც მისი პრორუსული დამპყრობლური ძალები, ქვეყნის შიგნით თუ გარეთ, რამდენად მართავენ საქართველოს პროკურატურას".

მიტროპოლიტი პეტრე გამორიცხავს, რომ მისი დაკითხვა დეკანოზ მამალაძის დაკითხვიდან გამომდინარე გადაწყდა.