დაავადებათა კონტროლის ცენტრის დირექტორის, ამირან გამყრელიძის განმარტებით, მკაცრი მარეგულირებლების მიერ აღიარებული ვაქცინები კორონავირუსის ინდური შტამის წინააღმდეგ ეფექტურია.

"ის ვაქცინები, რომელიც აღიარებულია მკაცრი მარეგულირებლის და ჯანმრთელობის მსოფლიო ორგანიზაციის მიერ ისინი მოიცავენ და ფარავენ იმ შტამებს, რომლებიც დღეს ცირკულირებენ მსოფლიოში. მათ შორის, რომელიც აღიარებულია WHO-ს მიერ არის კვლევები სინოფარმზეც, სინოვაკზეც, მოდერნაზეც, ფაიზერზეც. თვითონ ინდოეთის გამოშვება Bharat Biotech ვაქცინაზეც. ისინი ფარავენ ინდურ შტამს", — განაცხადა გამყრელიძემ.

ბრიტანული შტამის შემთხვევები საქართველოში

დაავადებათა კონტროლის ცენტრის ინფორმაციით, საქართველოში ინდური შტამით ინფიცირების შემთხვევები დაფიქსირდა. კერძოდ, როგორც NCDC-ში ამბობენ, ინდური შტამი დაუფიქსირდა ქვეყანაში შემოსულ 5 მოგზაურს.

დააავადებათა კონტროლის ცენტრის დირექტორის, ამირან გამყრელიძის განცხადებით, 5-დან 2 საქართველოს მოქალაქეა. მისივე თქმით, 3-მა უცხოელმა ქვეყანა უკვე დატოვა, საქართველოს მოქალაქეების კონტაქტები კი იდენტიფიცირებულნი და იზოლირებულნი არიან.

"მათზე მიმდინარეობს მეთვალყურეობა. ისინი არიან სახლის პირობებში და დაავადება მიმდინარეობს მსუბუქად", — განაცხადა მან.

როგორც გამყრელიძემ აღნიშნა ისინი საქართველოში მაისის შუა რიცხვებში შემოვიდნენ და შუა აღმოსავლეთის ერთ-ერთ ქვეყანაში მოგზაურობის ისტორია ჰქონდათ.

გამყრელიძის თქმით, ინდური შტამის გამოვლინება ხდება სპეციფიური PCR ტესტით და შემდგომ დასტურდება გენომის სეკვენირებით.