დააავადებათა კონტროლის ცენტრის დირექტორის, ამირან გამყრელიძის განცხადებით, 5 ინფიცირებულიდან, ვისაც ინდური შტამი დაუდასტურდა, 2 საქართველოს მოქალაქეა. მისივე თქმით, 3-მა უცხოელმა ქვეყანა უკვე დატოვა, საქართველოს მოქალაქეების კონტაქტები კი იდენტიფიცირებულნი და იზოლირებულნი არიან.

"მათზე მიმდინარეობს მეთვალყურეობა. ისინი არიან სახლის პირობებში და დაავადება მიმდინარეობს მსუბუქად", — განაცხადა მან.

გამყრელიძის თქმით, საქართველოს მოქალაქეების შემთხვევაში კორონავირუსით ინფიცირება დადგინდა სწრაფად, ინდური შტამის გამოვლენაზე კი დღეს, 26 მაისის დილით გაიგეს, როცა გენომის სეკვენირება დასრულდა. მისივე თქმით, ინფიცირებულ საქართველოს მოქალაქეებს ერთეული კონტაქტები ჰქონდათ და ძირითადად ოჯახის წევრები არიან.

რაც შეეხება უცხოელებს, გამყრელიძე ამბობს, რომ ისინი ქვეყანაში უარყოფითი ტესტის პასუხით შემოვიდნენ და ინფიცირებაზე მაშინ გაიგეს, როცა ქვეყნიდან წასვლა დააპირეს და PCR ტესტი გაიკეთეს. მისივე თქმით, ისინი ინფიცირებულები შემოვიდნენ და ინკუბაციური პერიოდი ჰქონდათ.

როგორც გამყრელიძემ აღნიშნა ისინი საქართველოში მაისის შუა რიცხვებში შემოვიდნენ და შუა აღმოსავლეთის ერთ-ერთ ქვეყანაში მოგზაურობის ისტორია ჰქონდათ.

გამყრელიძის თქმით, ინდური შტამის გამოვლინება ხდება სპეციფიური PCR ტესტით და შემდგომ დასტურდება გენომის სეკვენირებით.

დაავადებათა კონტროლის ცენტრის ინფორმაციით, საქართველოში ინდური შტამით ინფიცირების შემთხვევები დაფიქსირდა. კერძოდ, როგორც NCDC-ში ამბობენ, ინდური შტამი დაუფიქსირდა ქვეყანაში შემოსულ 5 მოგზაურს.