ნამახვანჰესის მშენებლობის მოწინააღმდეგე აქტივისტის, მარიტა მუსელიანის განცხადებით, აბსურდია მათ ედავებოდნენ იმ ჯებირის დაზიანებას, რომელიც არ უნდა იდგეს. ასე გამოეხმაურა ის შსს-ს განცხადებას, გუმათში აღმართული რკინის ჯებირის დაზიანების შესახებ გამოძიების დაწყებაზე.

მუსელიანის თქმით, ისიც გასარკვევია ჯებირის კიდეები აქტივისტებმა გადმოკეცეს თუ არა, რადგან ისინი ადგილზე იყვნენ და პროტესტის მონაწილეები ჯებირებს მხოლოდ ხელს ურტყამდნენ.

"ჯებირი რომელიც საერთოდ არ შეიძლება იდგას, იმის კიდის გადაკეცვაზე შეედაო ვინმეს, ცოტა აბსურდულად მეჩვენება. მართლა საკითხავია აქციის მონაწილეებმა გადმოკეცეს ეს გვერდი, თუ არა. იმიტომ, რომ ჩვენ აქ ვესწრებოდით პროცესს და ხელების ბრახუნი იყო. მაინც დავინტერესდები.

ჩვენი მოწოდება არ იყო კიდეების გადმოკეცვა. ჩვენ ვიყავით აქ და ჩვენს თვალწინ არ გადმოკეცილა, ვესწრებოდით ძალიან ბევრი ადამიანი ამას. გამოძიების საგანიც სწორედ ესაა, საინტერესოა აქციის მონაწილემ გადმოკეცა ნამდვილად თუ, არა. ნებისმიერ შემთხვევაში, აბსურდია, საერთოდ გვედავებოდეს ვინმე ისეთი ჯებირის დაზიანებას, რომელიც არ შეიძლება ბუნებაში არსებობდეს", — განაცხადა მან.

ამ თემას გამოეხმაურა აქტივისტი ვარლამ გოლეთიანიც. მისი მტკიცებით, წარმოუდგენელია ადამიანმა ხელით დააზიანოს მსგავსი ტიპის კონსტრუქცია და ქვებს რომ არ ურტყამდნენ დასტურდება იმით, რომ აქციის მონაწილეებს ხელები აქვს დასეიებული და ზოგს სისხლიც სდის.

26 მაისს, გვიან ღამით ნამახვანჰესის მოწინააღმდეგე აქტივისტები გუმათში ჩავიდნენ და კომპანია ენკას მანქანებისთვის ხეობის შესასვლელი გადაკეტეს. გუმათჰესთან მთელი ღამის განმავლობაში მობილიზებული იყო პოლიციაც. აქციის მონაწილეები ბარიკადებად აღმართულ რკინის ღობეს ხელს ურტყამდნენ და ამბობდნენ, რომ ხმაური გაგრძელდება იქამდე, სანამ მოთხოვნები არ დაკმაყოფილდება.

შინაგან საქმეთა სამინისტროს განცხადებით, გუმათში დაზიანებულია უსაფრთხოების მიზნით განთავსებული რკინის ჯებირები, რაზეც გამოძიება დაიწყეს.

"ნამახვანჰესის მშენებლობის მოწინააღმდეგეებმა გუშინ თბილისიდან რიონის ხეობაში გადაინაცვლეს და გუმათში განაგრძეს საპროტესტო აქცია. შეკრებილები მთელი ღამის განმავლობაში პოლიციის უსაფრთხოების ჯებირებს ქვებს და სხვადასხვა საგნებს ურტყამდნენ. სამინისტრო დეტალურად სწავლობს კანონდარღვევის ფაქტს და შესაბამისი სამართლებრივი რეაგირება მოჰყვება", — აცხადებენ უწყებაში.

ნამახვანჰესის მოწინააღმდეგეები გუმათში თბილისში გამართული ოთხდღიანი აქციების შემდეგ დაბრუნდნენ.