2018 წლის ბიუჯეტთან დაკავშირებით პრეზიდენტ ტრამპის პირველი ინიციატივა თავდაცვისა და უსაფრთხოების ბიუჯეტის 54 მილიარდი აშშ დოლარით გაზრდას ითვალისწინებს. თეთრი სახლის განცხადებით, იმავე რაოდენობის თანხა არა-თავდაცვის პროგრამებს მოაკლდება.

CNN-ის ცნობით, ინიციატივის შედეგად "ნაკლებად პრიორიტეტული პროგრამებისა და ფედერალური სააგენტოების უმრავლესობის" ბიუჯეტი შემცირდება.

ბევრი დეტალი, თუ როგორ მოხდება თანხების შემცირება ცნობილი არ არის, თუმცა ტრამპის ადმინისტრაციის ჩინოვნიკმა CNN-ს უთხრა, რომ სრული $54 მილიარდის დაზოგვა 2018 წლის ბიუჯეტში იქნება გათვალისწინებული. ბოლო 48 საათის განმავლობაში რამდენიმე ჩინოვნიკმა, ასევე, განაცხადა, რომ მნიშვნელოვნად შემცირდება გარემოს დაცვისა და საგარეო ხელშეწყობის პროგრამების ბიუჯეტი.

საგარეო ხელშეწყობაზე ფედერალური ბიუჯეტის ზუსტად 1% იხარჯება. მიუხედავად იმისა, რომ საგარეო ხელშეწყობის პროგრამა დიდი ხანია კონსერვატორების სამიზნეა, ამ პროგრამის ბიუჯეტის შემცირებით ტრამპის ადმინისტრაცია, სავარაუდოდ, 54 მილიარდ დოლარამდე თანხას ვერ მიიღებს.