დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, აგვისტოში Covid-19-ის ახალი მუტირებული შტამების ხარჯზე, როგორც ევროპაში ისე გლობალურად, შემთხვევების ზრდა გამორიცხული არ არის. კითხვაზე, ტურისტული სეზონის გახსნასთან ერთად, ელოდებიან თუ არა ისინი შარშანდელის მსგავსად, აჭარის რეგიონში კორონავირუსის შემთხვევების მატებას, გამყრელიძემ უპასუხა, რომ, "რა თქმა უნდა, მოსალოდნელია.

"გლობალური პროგნოზი არის, რომ ტოტალურად შემთხვევათა რაოდენობა ყველგან თანდათან ნელი ტემპით მოიკლებს. არ არის გამორიცხული, რომ აგვისტოში, აგვისტოს ბოლოსკენ ისევ დაიწყოს, როგორც ევროპაში, ისე გლობალურად შემთხვევების ზრდა ახალი მუტირებული შტამების ხარჯზე. ამიტომ, ყველგან, სადაც შემსუბუქებები მიმდინარეობს და ეს მიმდინარეობს ყველა ქვეყანაში ევროპის თითქმის, არის მეტი ყურაღება რეკომენდაციების დაცვაზე. პირველ რიგში, პირბადე, დისტანცია, ხალხმრავალი ადგილების თავის არიდება და რაც შეიძლება მეტი აცრა", — განაცხადა გამყრელიძემ.

25 მაისის მონაცემებით, საქართველოში კორონავირუსის 1 354 ახალი შემთხვევა დადასტურდა, გამოჯანმრთელდა 821, ხოლო გარდაიცვალა — 15 ადამიანი.

ბოლო 24 საათში ქვეყნის მასშტაბით ჩატარდა 30 456 კვლევა ტესტით, მათ შორის ანტიგენის სწრაფი ტესტით — 21 054, PCR-ით — 9 404.

Stopcov.ge-ზე გამოქვეყნებული ინფორმაციის თანახმად, დადებითობის დღიური მაჩვენებელი არის 4,45%, ბოლო 14 დღის განმავლობაში — 3,86%, ხოლო 7 დღის — 4,05%.