ბელარუსის პრეზიდენტმა, ალექსანდრე ლუკაშენკომ ახალი კანონები დაამტკიცა, რომელიც მედიისა და ინტერნეტის სფეროებს ზღუდავს. კანონის მიხედვით, კონკრეტულ ორგანოებს უფლება ეძლევათ, რომ მედიაორგანიზაციების სარედაქციო პოლიტიკაში ჩაერიონ.

კერძოდ, მედიას არასანქცირებული აქციების პირდაპირ ეთერში გაშუქება აეკრძალათ. გარდა ამისა, ინფორმაციის სამინისტროს უფლება მიეცა, შეწყვიტოს კონკრეტული მედიის საინფორმაციო გამოშვება, 2 ან მეტი წერილობითი შენიშვნის შემდეგ.

ახალი კანონით მედიას ეკრძალება გააშუქოს ისეთი საზოგადოებრივი გამოკითხვები, რომელთა ჩამტარებელ ორგანიზაციას შესაბამისი აკრედიტაცია არ აქვს გავლილი. ასევე, იკრძალება მედიაში ისეთი ჰიპერლინკების გამოყენება, რომლებზეც ის ინფორმაციაა გამოქვეყნებული, რის გავრცელებაც იკრძალება.

გენერალურ პროკურორს, მინსკის ოლქების პროკურორებს ეძლევათ უფლება შეზღუდონ წვდომა ინტერნეტ-რესურსებზე, თუ მიიჩნევენ, რომ ისინი ავრცელებენ ინფორმაციას ექსტრემისტულ საქმიანობაზე. ასევე, ისეთ ინფორმაციაზე, რომელსაც ქვეყნის ინტერესების დაზიანება შეუძლია.

გარდა ამისა, კანონი ითვალისწინებს ბელარუსის საინფორმაციო გარემოზე "უცხოური გავლენის" შემცირებას. მიუხედვად იმისა, თუ როდის არის დაფუძნებულიუ მედია მათ ხელმძღვანელები ვერ იქნებიან უცხოეთის მოქალაქეები, მოქალაქეობის არმქონე პირები, უცხოელი იურიდიული პირები ან ისინი, ვისაც კავშირი აქვთ უცხოელ კომპანიებთან.

ბელარუსში კიდევ უფრო მეტად მკაცრდება აკრედიტაციის აღება და მარტივდება მისი ჩამორთმევა ჟურნალისტებისთვის.