საერთაშორისო გამჭვირვალობა — საქართველოს ინფორმაციით, კომპანია არალმა, რომელიც ქართული ოცნების შემწირველია ამავე პარტიის დამფუძნებელთან, ბიძინა ივანიშვილთან დაახლოების შემდეგ მილიონობით ლარის ტენდერი მოიგო. არასამთავრობო ორგანიზაციის ანგარიშში აღნიშნულია, რომ არალი ტენდერებში მანამდეც იგებდა, თუმცა ივანიშვილთან თანამშრომლობის დაწყების შემდეგ თანხის ოდენობა გაიზარდა.

მათივე განცხადებით, კომპანია ტენდერებს იღებდა იმის მიუხედავადაც, რომ მისი ყოფილი მფლობელი ერთ-ერთი უკონკურენტოდ მოგებული ტენდერიდან 130 000 ლარის მითვისების ბრალდებით დააკავეს.

"შპს არალისთვის ბიუჯეტიდან გადარიცხული თანხა ათეულობით მილიონი ლარით გაიზარდა 2018 წლის აგვისტოდან, როცა კომპანიის მესაკუთრემ ოთარ თათეშვილმა აბასთუმანში ბიძინა ივანიშვილს საკუთარი სახლის ასაშენებლად 450 მ² მიწა მიჰყიდა. თუ მანამდე 7 წელში ტენდერებით ჯამურად 51 585 275 ლარი ჰქონდა მიღებული, მომდევნო ორწელიწადნახევარში მოგებული ტენდერებით ხელშეკრულებები 125 454 712 ლარზე (ჯამში ტენდერებით მიღებული შემოსავლების 68,9 %) გაუფორმდა", — ვკითხულობთ განცხადებაში.

ორგანიზაციაში აღნიშნავენ, რომ ამ გარიგებიდან 10 დღეში, აბასთუმანში, აუქციონზე უკონკურენტოდ ნაყიდი, ნახევრად ტყით დაფარული, ორი მიწის ნაკვეთი, ჯამში 3 883 მ² ფართობი, ოთარ თათეშვილის შვილმა, დემეტრე თათეშვილმა გაიფორმა. მათივე ინფორმაციით, მოგვიანებით, 2020 წლის აგვისტოში, დემეტრე თათეშვილმა ორივე მიწის ნაკვეთი სახელმწიფოს უკან დაუბრუნა და სანაცვლოდ, ქონების ურთიერთგადაცემის ხელშეკრულების საფუძველზე, მიიღო 4 660 მ² მიწა, რომელიც ბორჯომ-ხარაგაულის ეროვნულ პარკს ესაზღვრება და ბიძინა ივანიშვილის მშენებარე სასტუმრო პარაგრაფ მერიოტთან ახლოს მდებარეობს.

"2018 წლის ზაფხულიდან, მას შემდეგ რაც აბასთუმანში ბიძინა ივანიშვილმა თათეშვილებისგან მიწა იყიდა, შპს არალი აბასთუმანში, ფონდ ქართუს მიერ დაფინანსებული პროექტების განხორციელებაში აქტიურად ჩაერთო. მან ააშენა აბასთუმნის ფილტვის ცენტრი და კორპუსი ადგილობრივი მცხოვრებლებისთვის. ასევე შპს არალი აქტიურად იყო ჩართული სანატორიუმების ზეკარისა და ცისარტყელას ადგილებზე ბიძინა ივანიშვილის სასტუმროების მშენებლობისთვის მოსამზადებელ სამუშაოებში", — წერია განცხადებაში.

შპს არალის ტენდერები

ორგანიზაციის მოპოვებული ინფორმაციის თანახმად, დემეტრე თათეშვილს და მისი ოჯახის წევრებს წილები 12 კომპანიაში აქვთ, მათგან 7 ქართული ოცნების ხელისუფლების მმართველობის დროს დააფუძნეს.

მათივე ინფორმაციით, თათეშვილების კომპანიებიდან სახელმწიფო შესყიდვებში მხოლოდ შპს არალი მონაწილეობს, რომელიც 2011 წლიდან 2021 წლის მარტის ჩათვლით 289 ტენდერში მონაწილეობდა და აქედან 116-ში გაიმარჯვა, რისთვისაც ხელშეკრულებები 181 923 427 ლარზე გაუფორმდა. 3 756 442 ლარი კი გამარტივებული შესყიდვებით მიიღო.

ორგანიზაციაში აღნიშნავენ, რომ სამშენებლო კომპანია არალმა 2011-2021 წლებში ჯამში 181 923 427 ლარის ოდენობის ტენდერები მოიგო. მათი ინფორმაციით, აქედან 25 816 009 ლარი (ტენდერებიდან მიღებული საერთო თანხის 14,1%) უკონკურენტოდ, ხოლო 17 447 628 ლარი (9,5 %) — მისი კონკურენტების დისკვალიფიკაციის ხარჯზე.

TI-ის განცახდებით, ბოლო სახელმწიფო შესყიდვიდან შპს არალმა 47 070 891 ლარი მიიღო. ეს ტენდერი საქართველოს მუნიციპალური განვითარების ფონდმა აბასთუმანში, მდინარე ოცხეს კალაპოტის, ხიდების, მთავარი და საუბნო გზების რეაბილიტაციისთვის გამოაცხადა. ორგანიზაციის ინფორმაციით, არალი სამუშაოებს ბიძინა ივანიშვილთან დაკავშირებულ შპს ზიმოსთან ერთად განახორციელებს.

რაც შეეხება კორუფციაში ბრალდებას, ორგანიზაციაში აღნიშნავენ, რომ საქმე ახალციხის მუნიციპალიტეტში გამოცხადებულ 1 927 600 ლარის ღირებულების ტენდერს ეხებოდა. მათი ინფორმაციით, თათეშვილს გამამტყუენებლი განაჩენი დაკავებიდან ერთ თვეში გამოუტანეს და საპროცესო შეთანხმება გაუფორმეს, თუმცა, კორუფციაში მხილებული ბიზნესმენის კომპანია სახელმწიფო ბიუჯეტიდან მილიონიან ტენდერებს ისევ იღებდა.

"დაკავებიდან სამ კვირაში საავტომობილო გზების დეპარტამენტის მიერ გამოცხადებული ტენდერი მოიგო და ხელშეკრულება 3 099 328 ლარზე გაუფორმდა, განაჩენის გამოტანიდან ერთ თვეში კი კვლავ საავტომობილო გზების დეპარტამენტში მოგებული ტენდერით 199 900 ლარი დაერიცხა", — წერია ანგარიშში.

საერთაშორისო გამჭვირვალობა — საქართველო მოუწოდებს სახელმწიფო უსაფრთხოების სამსახურის ანტიკორუფციულ სააგენტოს, შეისწავლოს შპს არალის სახელმწიფო შესყიდვები და გამოარკვიოს, ხომ არ ჰქონდა ადგილი შესაძლო კორუფციულ გარიგებებს მასსა და შემსყიდველ ორგანიზაციებს შორის.