ცაგერის, ლენტეხის და ჭყონდიდის მიტროპოლიტი, მეუფე სტეფანე აცხადებს, რომ "არ არის აუცილებლობა" ობმუდსმენი ნინოწმინდის ბავშვთა პანსიონატში შეუშვან. მისი თქმით, არსებობენ სახელმწიფო ორგანოები, რომლებიც პანსიონატს ამონიტორინგებენ. ამის შესახებ მან რუსთავი 2-ის ღამის კურიერში ისაუბრა.

"ღირებულებები, რომლებსაც ისინი ატარებენ, ბავშვებთან არ შეიძლება მათი შეშვება, ასე ამბობს მეუფე და გარკვეულწილად, ამ საკითხში ვეთანხმები, იმიტომ, რომ არის რაღცები, რაც არის იდეოლოგიური საკითხები. იდეოლოგიური წნეხი სკოლაში, ბავშვებსა და ასე შემდეგ, მე მიუღებლად, მიმაჩნდა კომუნისტების მიმართებაში მიუღებლად მიმაჩნდა და ასეთივე წნეხი ხორციელდება პირადად ომბუდსმენის მიერაც", — ამბობს ის.

მისი მტკიცებით, ომბუდსმენი არის "პოლიტიკური იდეოლოგიური ორგანიზაცია", რომელიც იცავს "შერჩევით, ისე როგორც თვითონ აწყობს".

"ჩემი უფლებები არ უნდა დაეცვა, როდესაც ჩემზე ძალადობდნენ? ამხელა თავდასხმა მოხდა ჩემს რეზიდენციაზე, იქ ადამაინები იყვნენ, ვინც ამას პირდაპირ ახორციელდბენენ, ჩემი უფლება არ უნდა იყოს დაცული?

რაც მოხდა ჩვენს ეპარქიაზე, ეს რომ ყოფილიყო მუსლიმებზე ან ნებისმიერ რელიგიურ ორგანიზაციაზე, აუცილებლად იქნებოდა ერთი ამბავი და აჭრელებული ყველაფერი, მაგრამ ამ შემთხვევაში, ჩვენზე თავდასხმა არაფერი არაა", — აცხადებს მეუფე სტეფანე.

15 აპრილს სახალხო დამცველის რწმუნებულებს საქართველოს მართლმადიდებლური ეკლესიის საპატრიარქოს ნინოწმინდის წმინდა ნინოს პანსიონში მონიტორინგის განხორციელების შესაძლებლობა არ მიეცათ. ომბუდსმენის აპარატში აცხადებდნენ, რომ ამის მიზეზად, დაწესებულების წარმომადგენელმა სხალთის მთავარეპისკოპოსის მეუფე სპირიდონის მითითება დაასახელა. 7 მაისს ორგანიზაცია პარტნიორობა ადამიანის უფლებებისთვის განაცხადა, რომ გაეროს ბავშვთა კომიტეტმა სახელმწიფოს პანსიონატში ბავშვთა უფლებრივი მდგომარეობის შემოწმება დაავალა.