საქართველოს საგარეო საქმეთა მინისტრი, დავით ზალკალიანი ისრაელში განვითარებულ მოვლენებს ეხმაურება და აცხადებს, რომ საქართველოს მთავრობა გმობს ძალადობასა და სარაკეტო თავდასხმას მშვიდობიან მოსახლეობაზე.

"საქართველოს მთავრობა ყურადღებით ადევნებს თვალყურს ისრაელში განვითარებულ მოვლენებს. საქართველო მკაცრად გმობს ძალადობასა და სარაკეტო თავდასხმას მშვიდობიან მოსახლეობაზე, რაც მშვიდობასა და სტაბილურობას უთხრის ძირს რეგიონში. რეგიონში დაძაბულობის დეესკალაციას ალტერნატივა არ აქვს", — წერს ზალკალიანი.

10 მაისს იერუსალიმში დაპირისპირება გამწვავდა. რამდენიმე წლის შემდეგ პირველად, ჰამასმა იერუსალიმზე სარაკეტო თავდასხმა განახორციელა. საპასუხოდ, ისრაელმა ღაზას სექტორზე საჰაერო იერიში მიიტანა. 11 მაისს ღაზას სექტორმა დაბომბა თელ-ავივიც. სიტუაცია დაიძაბა ქალაქ ლოდშიც. მედიების ცნობით, გვიან ღამით დაიწვა სინაგოგები, მაღაზიები და ათეულობით მანქანა. მთავრობამ საგანგებო მდგომარეობა გამოაცხადა და სიტუაციის განსამუხტად ქალაქში სასაზღვრო პოლიცია გაიგზავნა.

დაპირისპირება პარასკევს საღამოს დაიწყო, რა დროსაც პირველ ღამეს 200-ზე მეტი პალესტინელი და 17 ისრაელელი პოლიციელი დაშავდა. შაბათს შეტაკებები განახლდა დამასკოს კარიბჭესთან მას შემდეგ, რაც ათასობით მუსლიმმა ალ-აქსას მეჩეთთან ილოცა. მანამდე ისრაელის პოლიციამ გააჩერა ავტობუსები, რომლებსაც მომლოცველები მეჩეთისკენ გადაჰყავდა და რამდენიმე პალესტინელი დააკავა.

ახლო აღმოსავლეთის მოლაპარაკებებში მონაწილე აშშ, ევროკავშირი, რუსეთი და გაერო შეშფოთებას გამოხატავენ მზარდი ძალადობის გამო. ამასთან, იორდანიამ დაგმო ისრაელის პოლიციის ქმედებები და ხელისუფლების ქმედებებს "ბარბაროსული" უწოდა.