დღეს ქართულ ინტერნეტი სულ მცირე ხნით მოეშვა პოლიტიკური პროცესების განხილვას და ერთი კითხვის ირგვლივ გაერთიანდა — რა "დიეტას" იცავდა ნიკა მელია.

ოპოზიციური პარტიის ლიდერმა ციხე ხანგრძლივი და დაძაბული მოლაპარაკებების შემდეგ დატოვა და ესეც დიდი ინტერესის საგანი იყო, მაგრამ აღდგომაგამოვლილი, პასკებზე შეყვარებული ქართველების დარდი მთებსაც გადაწონის. ამიტომაც იქცა დღის ერთ-ერთ თემად მელიას "დიეტა".

ამ საკითხისადმი დიდ ინტერესში, ალბათ, უილ სმიტმაც შეიტანა მცირე წვლილი.

სად უილ სმიტი და სად ნიკა მელიაო იკითხავთ, მაგრამ ფაქტია, რომ მსახიობის სურვილი დაიწყოს ვარჯიში, ინტერნეტში დიდი განხილვის საგანი გახდა. ჰოდა, ვინც სმიტის შემართებას იზიარებს, მაგრამ ველობილიკზე სირბილი, ლახტი ან აზიდვები დიდად არ ხიბლავს, დიეტის გზით წასვლა ურჩევნია.

ბევრი რომ არ გავაგრძელოთ, გეტყვით, რომ ნიკა მელიამ თქვა, როგორ დაიკლო ციხეში. პოლიტიკოსის თქმით, დღეში ერთხელ ჭამდა, დღისით და მხოლოდ სუპს, უმეტესად კი — მჟაუნას სუპს.

გაუწევს თუ არა "მელიას დიეტა" კონკურენციას უგულავას დიეტას, დრო გვიჩვენებს. ჩვენი მხრივ კი გირჩევთ, რომ დიეტის დაწყებამდე აუცილებლად გაიაროთ კონსულტაციები ენდოკრინოლოგთან და გაითვალისწინეთ, რომ ყველა ორგანიზმს ინდივიდუალური მიდგომა სჭირდება. აქვე, ისიც არ დაგავიწყდეთ, რომ სჯობს ციხეში არ მოხვდეთ და დიეტა სახლის პირობებში დაიცვათ.

მაგრამ ყველაზე მთავარია გიყვარდეთ საკუთარი თავი ისეთი, როგორიც ხართ და არ დაგავიწყდეთ, რომ არ არის აუცილებელი იმ სტანდარტებს ერგებოდეთ, რასაც საზოგადოება აწესებს. გახსოვდეთ, მთავარია თავს კარგად გრძნობდეთ და ყოველთვის მშვენიერი ხართ.

ამავე თემაზე: