თბილისის სააპელაციო სასამართლომ უცვლელი დატოვა პარლამენტის წევრის, ვალერი გელაშვილის მიმართ თავდასხმის ფაქტზე მსჯავრდებული, შინაგან საქმეთა ყოფილი მინისტრის, ვანო მერაბიშვილის მიმართ თბილისის საქალაქო სასამართლოს 2016 წლის 22 სექტემბრის გამამტყუნებელი განაჩენი. ამ ინფორმაციას საქართველოს მთავარი პროკურატურა ავრცელებს.

თბილისის საქალაქო სასამართლომ ვალერი გელაშვილის ცემის ფაქტზე, შინაგან საქმეთა ყოფილი მინისტრი ვანო მერაბიშვილი, სპეციალური ოპერატიული დეპარტამენტის ყოფილი ხელმძღვანელი ერეკლე კოდუა და ამავე დეპარტამენტის სამმართველოს ყოფილი უფროსი, გია სირაძე დამნაშავედ 2016 წლის 22 სექტემბერს ცნო.

მერაბიშვილის თბილისის საქალაქო სასამართლომ სასჯელის ზომად განუსაზღვრა თავისუფლების აღკვეთა 6 წლისა და 9 თვის ვადით, მასვე 2 წლისა და 3 თვის ვადით ჩამოერთვა თანამდებობის დაკავების უფლება. ერეკლე კოდუასა და გია სირაძეს სასჯელის ზომად განესაზღვრა თავისუფლების აღკვეთა 9 წლის ვადით. მათვე 2 წლისა და 3 თვის ვადით ჩამოერთვათ თანამდებობის დაკავების უფლება.