ნაციონალური მოძრაობის პოლიტსაბჭოს წევრი, ხატია დეკანოიძე აცხადებს, რომ ევროკავშირმა პარტიის თავმჯდომარის, ნიკა მელიას გირაოს თანხის ჩარიცხვით, აღიარა, საქმის პოლიტიკური მოტივი.

"ევროკავშირის მიერ პოლიტიკურად მოტივირებული საქმის აღიარება, ნიკას პილიტპატიმრად მთელი მსოფლიოს მასშტაბით გამოცხადება — ეს არის ჩვენი მეგობრების მიერ დეკლარირებული გირაოს მთავარი შინაარსი.

ოფიციალურად გაფორმდა, რომ ქართულ ოცნებას პოლიტიკური პატიმრები ჰყავს. დარწმუნებული ვარ, ნიკა ძალიან მალე თავისუფლებაზე იქნება", — წერს დეკანოიძე საკუთარ ფეისბუქგვერდზე.

დღეს, 8 მაისს ევროკავშირმა ნიკა მელიას გირაოს თანხა გადაიხადა. გადარიცხვა საქართველოს ახალგაზრდა იურისტთა ასოციაციის შუამავლობით განხორციელდა.

ახლა პროკურატურამ უნდა მიმართოს სასამართლოს აღკვეთის ღონისძიების შეცვლის შუამდგომლობით, რათა მელიას პატიმრობა გირაოთი შეეცვალოს. პროკურატურაში აცხადებენ, რომ თანხა ჯერ არ ასახულა და როცა აისახება, დაიწყებენ შესაბამის პროცედურებს.

საქართველოს ახალგაზრდა იურისტთა ასოციაციაში განმარტავენ, რომ პროცედურების დასაწყებად თანხის ასახვა არაა საჭირო. მეტიც, საია-ს თავმჯდომარის, ნიკა სიმონიშვილის განმარტებით, პროკურატურას აქამდეც შეეძლო ამ პოროცედურის დაწყება.

გაიგეთ მეტი: