პარტია გირჩის ერთ-ერთი ლიდერი, იაგო ხვიჩიას თქმით, პრეზიდენტი სალომე ზურაბიშვილი "სერიოზულად ფიქრობს" ვეტო დაადოს ადმინისტრაციულ სამართალდარღვევათა კოდექსში შეტანილ ცვლილებებს.

"ვფიქრობ, რომ პრეზიდენტი სერიოზულად ფიქრობს ვეტოზე. წინააღმდეგ შემთხვევაში, უცნაურია, ის ერთობოდეს ქართველ პოლიტიკოსებთან ინდივიდუალური შეხვედრებით", — განაცხადა ხვიჩიამ.

იგი გაუგებარს უწოდებს ახალი კანონპროექტის ინიცირების იდეას და ამბობს, რომ სასურველია ქართული ოცნება და ოპოზიცია ერთიან დოკუმენტზე შეთანხმდეს.

"კანონპროექტების კანონპროექტებით დათრგუნვა, როგორც ჩანს, არის ქართული პარლამენტარიზმის ერთგვარი სტილი, რომლის შინაარსი მე კარგად არ ვიცი. მე მგონია, რომ ჩვენ უფრო უნდა შევძლოთ ერთმანეთთან საუბარი, რომ ერთიან დოკუმენტზე შევთანხმდეთ და არა ის, რომ როცა რაღაც არ მოგვეწონება, ყველამ ჩვენ-ჩვენი დოკუმენტებით და კანონპროექტებით ვიაროთ. ეს ჩემთვის ცოტა გაუგებარია", — განაცხადა იაგო ხვიჩიამ.

ოპოზიციის ნაწილი ადმინისტრაციულ სამართალდარღვევათა კოდექსში შეტანილ ცვლილებებზე პრეზიდენტისგან ვეტოს უფლების გამოყენებას მოითხოვს. პრეზიდენტმა სალომე ზურაბიშვილმა ამ საკითხზე სასაუბროდ ოპოზიციური პარტიებთან, მათ შორის გირჩთან, შეხვედრები გამართა.

გუშინ, 6 მაისს, პრეზიდენტთან შეხვედრაზე იმყოფებოდა დეპუტატი სალომე სამადაშვილი, რომელიც აცხადებს, რომ თუ პრეზიდენტი ვეტოს არ გამოიყენებს, განიხილება ახალი საკანონმდებლო ცვლილების დაინიცირებას.

ცვლილებები ადმინისტრაციულ კოდექსში

29 აპრილს პარლამენტმა ადმინისტრაციულ სამართალდარღვევათა კოდექსში ცვლილებები მესამე მოსმენით დაამტკიცა. კანონპროექტს საკანონმდებლო ორგანო დაჩქარებულად განიხილავდა. ცვლილებები 2021 წლის პირველი ივნისიდან ამოქმედდება.

ახალი კანონპროექტის თანახმად, ადმინისტრაციულ სამართალდარღვევათა კოდექსში ცვლილებები შედის, რის შედეგადაც წვრილმანი ხულიგნობისა (166-ე მუხლი) და სამართალდამცველის მოთხოვნისადმი დაუმორჩილებლობისთვის (173-ე მუხლი) სანქციები იზრდება.

წვრილმან ხულიგნობაზე პირველი ადმინისტრაციული დარღვევის შემთხვევაში, სანქცია რჩება იგივე, ანუ 500-დან 1000 ლარამდე ჯარიმა ან 15 დღემდე პატიმრობა. განმეორებითი სამართალდარღვევის შემთხვევაში ჯარიმა იქნება 1 500-დან 2 000 ლარამდე ან 5-დან 15 დღემდე პატიმრობა.

რაც შეეხება სამართალდამცველის მოთხოვნისადმი დაუმორჩილებლობისთვის, აღნიშნული სამართალდარღვევა გამოიწვევს დაჯარიმებას 2 000-დან 3 000 ლარამდე ან პატიმრობას 15 დღემდე ვადით. განმეორების შემთხვევაში 3 500 ლარიდან 4 500-ლარამდე ჯარიმა ან 7-დან 15 დღემდე პატიმრობა.

ამასთან ცვლილება ეხება პატიმრობასაც. 247-ე მუხლი ჩამოყალიბდა შემდეგი რედაქციით:

1. ადმინისტრაციული დაკავების დროს, დაკავებული პირი პირველი შესაძლებლობისთანავე, მაგრამ არა უგვიანეს 24 საათისა წარედგინება სასამართლოს.
2. მტკიცებულების მოპოვების მიზნით, ამ მუხლის პირველი ნაწილით გათვალისწინებული ვადა შეიძლება ერთჯერადად გახანგრძლივდეს არაუმეტეს 24 საათით. ამ შემთხვევაში უფლებამოსილი ორგანოს შესაბამისი თანამშრომელი წერილობით ასაბუთებს ადმინისტრაციული დაკავების ვადის გახანგრძლივების მიზანშეწონილობას.
3. თუ დაკავებული პირი ამ მუხლის პირველი ან მეორე ნაწილით გათვალისწინებულ ვადაში არ წარედგინა სასამართლოს, იგი დაუყოვნებლივ უნდა გათავისუფლდეს.
4. დაკავებული პირი სასამართლოსთვის წარდგენამდე უფლებამოსილმა ორგანომ შეიძლება მოათავსოს დროებით მოთავსების იზოლატორში.