დონალდ გლოვერი, იგივე Childish Gambino ამერიკელი მსახიობი და მუსიკოსია. მისი ერთ-ერთი ყველაზე პოპულარული სიმღერის This Is America პრემიერა 2018 წელს შედგა.

მუსიკალური კლიპი, რომელიც სიურრეალისტურ სტილშია გადაწყვეტილი და აშშ-ში რასისტულ პრობლემებს და იარაღის კონტროლის თემას ეხება, მაშინვე პოპულარული გახდა. მუსიკოსმა ამ ნამუშევრისთვის გრემიც კი დაიმსახურა.

წელს კომპოზიცია კიდევ ერთხელ მოექცა ყურადღების ცენტრში, მას შემდეგ, რაც გაირკვა რომ რეპერი Kidd Wes დონალდ გლოვერს პლაგიატში ადანაშაულებს.

აშშ-ს ფედერალური სასამართლოს დოკუმენტების თანახმად, ემელიკე ნოსუოჩა (kidd Wes) ამბობს, რომ This Is America "აშკარად ჰგავს" სიმღერას, რომელიც მან გამოუშვა საუნდქლაუდზე ორი წლით ადრე სახელწოდებით Made in America. ნიუ-ორკის სასამართლოში შეტანილ სარჩელში ნათქვამია, რომ ეს ორი კომპოზიცია ერთმანეთს ჰგავს უნიკალური მელოდიით, შინაარსით და შესრულების მანერით. რეპერი Kidd Wes განცხადებით, მის მიერ დაქირავებული ექსპერტები მიიჩნევენ, რომ კომპოზიციებს შორის დამთხვევები, შეუძლებელია უბრალო შემთხვევითობა იყოს.

შეგიძლიათ Kidd wess-ის სიმღერა Made in america თქვენც მოისმინოთ და შეაფასოთ, ნამდვილად ჰგავს თუ არა ეს ორი კომპოზიცია ერთმანეთს.

საჩივარში დასახელებულ ბრალდებულთა შორის არის ჩაილდიშ გამბინოს ხმის ჩამწერი სტუდია RCA და რეპერი Young Thug, რომელიც სიმღერის ერთ-ერთი ავტორია.

ეს არ არის პირველი შემთხვევა, როდესაც This Is America-ს სხვა კომპოზიციას ადარებენ. 2018 წელს ერთ-ერთმა ბლოგერმა იგი ჯეის ჰარლის სიმღერას American Pharaoh-ს შეადარა. ჰარლიმ ჩივილისგან თავი შეიკავა, რადგან გამბინოს მენეჯერმა უარყო პლაგიატის ბრალდებები და თქვა, რომ 2015 წლით დათარიღებული კომპიუტერული ფაილები ამტკიცებს, რომ სწორედ გამბინოს სიმღერაა ორიგინალი.

ახალ ბრალდებებთან დაკავშირებით დონალდ გლოვერს ჯერ განცხადება არ გაუკეთებია.