დაავადებათა კონტროლის ცენტრის ხელმძღვანელი, ამირან გამყრელიძე მადლობას უხდის დეკანოზ გიორგი ჩაჩავს, რომელმაც კორონავირუსზე ვაქცინა გაიკეთა. გამყრელიძის შეფასებით, ეს სამოქალაქო პასუხისმგებლობისა და საზოგადოებისთვის საუკეთესო მაგალითის ჩვენებაა.

"მაქვს პატივი მამა გიორგისთან ბოლო 25 წელი სულიერი ახლობლობა მაკავშირებდეს. ის ყოველთვის მხარს უჭერს პროგრესულ იდეებს, კარგად იცნობს მედიცინისა და საზოგადოებრივი ჯანმრთელობის თანამედროვე მიღწევებს და მოსახლეობას ყოველთვის აძლევს პირად მაგალითს", — ნათქვამია ამირან გამყრელიძის განცხადებაში, რომელიც NCDC-ის გვერდზე გავრცელდა.

დეკანოზმა გიორგი ჩაჩავამ კორონავირუსის საწინააღმდეგო ვაქცინა დღეს, 6 მაისს გაიკეთა. ის პირველი მართლმადიდებელი სასულიერო პირია, რომელიც საჯაროდ აიცრა. მისი თქმით, მოსახლეობამ ვაქცინა უნდა გაიკეთოს, რათა ცხოვრების ძველ ტემპს დავუბრუნდეთ.