უცნაური ამბების გმირები ბოლოს 2019, უფრო სწორად 1985 წელს ვიხილეთ და მესამე სეზონის დასასრულს აღმოვაჩინეთ, რომ ჰოპერი მოკვდა, ილევენმა სუპერძალები დაკარგა, ბაიერსების ოჯახი ჰოუკინსიდან გაემგზავრა, ხოლო რუსების დაწესებულება განადგურდა.

თუმცა, მეოთხე სეზონის ახალ თიზერში ყველაფერი სხვანაირადაა: დაწესებულება ისევ ადგილზეა და მისაღებში უამრავი ბავშვი თამაშობს. ისინი ზუსტად ისე არიან გამოწყობილნი, როგორც ილევენი სერიალის დასაწყისში. მათთან მეცნიერი შედის, რომელსაც ბავშვები "პაპას" ეძახიან, ის კი მათ სიურპრიზის შესახებ ამცნობს, სანამ კადრი მე-11 ნომერ ოთახთან ჩერდება.

ეს ახალი სეზონიდან პირველი კადრები არაა. მეოთხე სეზონის პირველი ტრეილერი უამრავი ფანის მოლოდინსა და ნატვრას საბოლოოდ სცემს პასუხს: ჯიმ ჰოპერი ცოცხალია და რუსების ტყვეობაში იმყოფება. ახალი სეზონის გამოსვლის თარიღი ჯერჯერობით უცნობია.