შეიძლება, რთული დასაჯერებელია, მაგრამ უკვე ერთ წელზე მეტი გავიდა, რაც Stranger Things-ის მესამე სეზონი ვნახეთ და მას შემდეგ ჩვენი საყვარელი გმირების ისტორიის გაგრძელებას ველით.

სამწუხაროდ, პანდემიის გამო შემდეგი სეზონის გადაღებები შეჩერებულია, თუმცა ძალიან რომ არ მოგვეწყინა, სერიალის შემქმნელებმა — როს და მეთ დაფერებმა The Hollywood Reporter-თან ინტერვიუში გაამხილეს, რომ ეს ცნობილი სატელევიზიო შოუ მეოთხე სეზონით არ დასრულდება და წინ კიდევ დიდი გეგმები აქვთ.

"ჩვენ უკვე ვიცით, თუ როგორი იქნება დასასრული და ისიც ვიცით, თუ როდის იქნება ამისთვის შესაფერისი მომენტი. პანდემიამ მოგვცა საკმარისი დრო, რომ მომავალის გეგმებისთვის გადაგვეხედა და გადაგვეწყვიტა, რა იქნებოდა უკეთესი სერიალისთვის. ყველაფრის ფურცელზე გაწერამ შესაძლებლობა მოგვცა, ზუსტად დავრწმუნებულიყავით, თუ სადამდე უნდა გაგრძელებულიყო ისტორია", — აღნიშნეს მათ.

როს და მეთ დაფერებმა მეოთხე სეზონზეც ისაუბრეს: მათი თქმით, პანდემიამ ერთი მხრივ შოუს წარმოება შეაფერხა, მეორე მხრივ კი მათ მეტი დრო მისცა სცენარის დახვეწაზე სამუშაოდ:

"პირველად გვაქვს სცენარი ბოლომდე დაწერილი, რის გამოც საშუალება გვაქვს, სრულ სურათს შევხედოთ და ისე შევიტანოთ საჭირო ცვლილებები მასში".

სამწუხაროდ, შოუს შემქმნელები მეოთხე სეზონის პრემიერის თარიღზე ვერაფერს ამბობენ: მათ ისიც კი არ იციან, როდის განახლდება გადაღებები, რომელიც მარტში შეწყდება. მართალია, სექტემბრის მეორე ნახევარში ვარაუდობენ გადასაღებ მოედანზე დაბრუნებას, თუმცა დანამდვილებით ესეც არ იციან, რადგან ყველაფერი უახლოეს მომავალში განვითარებულ მოვლენებზე იქნება დამოკიდებულები.

რაც მთავარია, ვიცით, რომ ეკრანებზე კვლავ ვიხილავთ შერიფ ჯიმ ჰოპერს, რომელსაც მაყურებელი მესამე სეზონის ბოლოს ცრემლებით დაემშვიდობა, თუმცა სერიალის მესვეურებმა მოულოდნელი სიურპრიზით მაყურებლის გახარება გადაწყვიტეს.

ისღა დაგვრჩენია, მეოთხე სეზონის გამოსვლას დაველოდოთ, რათა გავიგოთ, როგორ გადაურჩა შერიფი ლაბორატორიაში აფეთქებას, თან კი იმაზე ფიქრით დავიმშვიდოთ თავი, რომ დიდი ალბათობით, სერიალი კიდევ დიდხანს არ დასრულდება: რაც იმას ნიშნავს, რომ უფრო მეტ დროს გავატარებთ საყვარელ პერსონაჟებთან ერთად და მათი თავგადასავლების შესახებ მეტს შევიტყობთ.