საპატრიარქოს საზოგადოებასთან ურთიერთობის სამსახურის ხელმძღვანელი, დეკანოზი ანდრია ჯაღმაიძე 4 მაისს დავითგარეჯში მომხდარ დაპირისპირებაზდე აცხადებს, რომ წინასწარ გამიზნული პროვოკაცია იყო.

"კადრები ვნახე. საერთო სურათიდან არ უნდა ამოვარდეს გუშინდელი ინციდენტი. საერთო სურათი კი არის ის, რომ დაძაბული არის სიტუაცია ჩიჩხიტურისა და უდაბნოს მონასტრების საზღვრის იქეთ მოხვედრის გამო...

გუშინდელი დაპირისპირება ეს არ არის გუშინდელი მხოლოდ, არამედ ეს არის პრინციპული წინააღმდეგობა შეხედულებებში, რასაც ჩვენ ვხედავთ ზოგიერთი სატელევიზიო საშუალების მიერ გაჩაღებულ კამპანიასა და ეკლესიის დამოკიდებულებას შორის დავით გარეჯის პრობლემასთან. განსაკუთრებით მწვავედ ამ აზრთა სხვადასხვაობას, რა თქმა უნდა, აღიქვამენ ის ბერები, რომლებიც იქ, საზღვრის სადარაჯოზე დგანან...

გუშინდელი ინციდენტი საერთო ფონზე შემდეგნაირად იკითხება. ეს არის წინასწარ გამიზნული პროვოკაცია, რადგან დავითგარეჯში განსაკუთრებულად აღიქვამენ პრობლემას, როდესაც მთავარი არხი გარეჯის ბერებს გრუს აგენტებად აცხადებს და ივერი მელაშვილს ეროვნულ გმირად, ეს განსაკუთრებულად ძაბავს იქ სიტუაციას", — განაცხადა ჯაღმაიძემ TV პირველთან.

4 მაისს დავით გარეჯში მთავარი არხის გადამღებ ჯგუფსა და კარტოგრაფ ივერი მელაშვილს დაუპირისპირისპირდნენ. ტელეკომპანიის გავრცელებულ კადრებში ჩანს, რომ აგრესიული სასულიერო და სამოქალაქო პირები მელაშვილს ემუქრებიან და ჟურნალისტს ფიზიკურად უხეშად ეხებიან.