ქართული ოცნების დეპუტატის, მამუკა მდინარაძის განცხადებით, ოპოზიციის წარმომადგენლები "ცოტა ფრთხილად უნდა იყვნენ", როცა პოლიციელებზე "ასე მეორეხარისხოვნად" საუბრობენ. ამაზე მან საკუთარ Facebook-ზე დაწერა და ოპოზიციის პროექტში არსებული თანხმობის პუნქტი შეაფასა.

"აბსოლუტურად მიუღებელია აგდებული დამოკიდებულება ქართველი პოლიციელის მიმართ. წარმოუდგენელია, ვის მოაფიქრდა, რომ ამნისტიის პირობა იყოს დაზარალებულის თანხმობა, ოღონდ ისე, რომ თუ დაზარალებული პოლიციელია, მისი აზრი და თანხმობა არავის აინტერესებდეს. ცუდი არ იქნება, ალტერნატიული ამნისტიის პროექტის ავტორები მიხვდნენ, რომ პოლიციელის მიმართ დისკრიმინაციის მსგავსი მასშტაბი აბსოლუტურად მიუღებელია", — წერს მდინარაძე.

მდინარაძის შეფასებით, ოპოზიციის პროექტს "სხვა ხარვეზებიც" აქვს. კერძოდ, მისი მტკიცებით, მათი პროექტი არ შეესაბამება შეთანხმებას, რომლის საფუძველზე კანონპროექტი უნდა მომზადებულიყო.

"ამ ქვეყანაში პრიორიტეტულია ყველა ადამიანის უფლებების დაცვა, დემონსტრანტი იქნება ის, პოლიციელი თუ სხვა, საიდანაც პოლიციელის უფლებების გამორიცხვა და მათი ამგვარი დისკრიმინაციის მცდელობა ყურადღების მიღმა არასდროს უნდა დარჩეს", — წერს ის.

28 აპრილს ოპოზიციამ ამნისტიის შესახებ კანონპროექტი დაარეგისტრირა. მოლაპარაკებების შემდეგ მათ საბოლოოდ გადაწყვიტეს, რომ პროექტი ქართული ოცნებისგან დამოუკიდებლად შეემუშავებინათ.

ოპოზიციის ვერსიაში საუბარია დაზარალებულის თანხმობაზე. კერძოდ, მათი კანონპროექტის თანახმად, ამნისტია ბრალდებულ/მსჯავრდებულ პირზე ვრცელდება შესაბამისი დაზარალებულის (ფიზიკური პირის) ნოტარიალურად დამოწმებული წერილობითი თანხმობის შემთხვევაში.

გაიგეთ მეტი: