საქართველოს სახალხო დამცველი, უჩა ნანუაშვილი მიიჩნევს, რომ რეიტინგი არ უნდა იყოს ერთადერთი კრიტერიუმი, რის გამოც საზოგადოებრივ მაუწყებელზე გადაცემების დახურვის გადაწყვეტილება მიიღება. ნანუაშვილი საზოგადოებრივი მაუწყებლის მენეჯმენტის მიერ გადაცემების რეიტინგის საშუალებით გადარჩევის გეგმას დღეს გამოეხმაურა.

მისი თქმით, საზოგადოებრივი მაუწყებლის ახალი ხელმძღვანელობის ხედვა არ არის საკითხის სრულფასოვან შესწავლაზე დაყრდნობილი გადაწყვეტილება და კითხვის ნიშნებს აჩენს რეფორმის მთელი პროცესის მიმართ. ნანუაშვილი მაუწყებლის ვალდებულებებზეც ამახვილებს ყურადღებას, რომლის მიხედვითაც არხი ვალდებულია პროგრამებში ასახოს საზოგადოებაში არსებული ყველა ჯგუფის ინტერესები.

"სახალხო დამცველი მოუწოდებს საზოგადოებრივი მაუწყებლის ახალ ხელმძღვანელობასა და სამეურვეო საბჭოს, საზოგადოებრივი მაუწყებლის რეფორმის საკითხი განიხილონ საზოგადოების, მათ შორის თანამშრომელთა მაღალი ჩართულობით, გამჭვირვალედ და მიიღონ ისეთი გადაწყვეტილება, რომელიც შესაბამისობაში იქნება როგორც კანონთან, ასევე საზოგადოებრივი მაუწყებლობის იდეასა და მიზნებთან,"- აღნიშნულია სახალხო დამცველის განცხადებაში.

მისი ხედვით, გადაცემების შეჩერება ან დახურვა, სავარაუდოდ, თანამშრომლებთან შრომითი ურთიერთობების გადახედვასაც გამოიწვევს. მისი თქმით, მნიშვნელოვანია, რომ სამეურვეო საბჭომ საკითხის განხილვისას ამ საკითხსაც მიაპყროს ყურადღება.

საზოგადოებრივი მაუწყებლის აღმასრულებელმა საბჭომ სამეურვეო საბჭოს 17 თებერვალს გადაცემების გადარჩევის ხედვა წარუდგინა. მათ მიაჩნიათ, რომ გადაცემები სამ ჯგუფად უნდა დაიყოს.

  • გადაცემები, რომელიც იზიდავს მაყურებელს, მათი რეიტინგი არხის საშუალო რეიტინგზე მაღალია;
  • გადაცემები, რომელის რეიტინგიც მაუწყებლის საშუალო რეიტინგის ფარგლებშია;
  • გადაცემები, რომელიც საშუალო რეიტინგზე დაბალია და იწყებს მაყურებელთა მიგრაციას სხვა არხზე.