გირჩი — მეტი თავისუფლების ლიდერის, ზურაბ ჯაფარიძის განცხადებით, სასაფლაოზე შესვლის და კანონის დარღვევის შესაძლებლობა არ მისცეს, რომ ჯარიმა არ გამოეწერათ. ამის შესახებ მან საკუთარ Facebook-ზე დაწერა.

"პირველ ბარიერში გავძვერი სკუტერით, მაგრამ მეორე ბარიერი დაუძლეველი აღმოჩნდა. ეს ხდება საბურთალოს სასაფლაოზე პოლიციელების ცოცხალი კედლებია ყველგან. ამჯერად ბებია-ბაბუის საფლავზე არ მიმიშვეს, არ მომცეს კანონის დარღვევის შესაძლებლობა, რომ ჯარიმა არ დაეწერათ.

ოდესმე მაინც მოვუყვები შვილიშვილებს, რომ ასეთ საგიჟეთშიც მომიწია ცხოვრებამ, თუმცა ჯარიმის ქვითარი მაინც კარგი იქნებოდა საჩვენებლად. ეს ჰგონია ხალხს ნორმალური და მაინც მე ვარ ამ ქვეყანაში ტრადიციების, ადათების და ქართველობის ნომერ პირველი მტერი", — წერს ის.

საკოორდინაციო საბჭოს გადაწყვეტილებით, საფლავებზე გასვლა 2-დან 4 მაისის ჩათვლით აკრძალული იქნება. ეს აკრძალვა არ ითვალისწინებს გამონაკლისებს გეოგრაფიული ლოკაციის ან ადმინისტრაციული ერთეულის მიხედვით. შინაგან საქმეთა სამინისტროს თანამშრომლები მთელი ქვეყნის მასშტაბით სასაფლაოების მიმდებარე ტერიტორიებს დილიდან აკონტროლებენ. შეზღუდვების დარღვევა ითვალისწინებს სამართალდამრღვევი პირსი დაჯარიმებას 2 000 ლარის ოდენობით.