ჯანდაცვის მინისტრი, ეკატერინე ტიკარაძე განმარტავს, როგორ იღებს საკოორდინაციო საბჭო გადაწყვეტილებას შეზღუდვების დაწესებაზე. მისი თქმით, განიხილება რამდენიმე ცვლადი, საიდანაც 5-6 მაინც უნდა აჩვენებდეს შეზღუდვის საჭიროებას იმისთვის, რომ ეს გადაწყვეტილება მიიღონ.

"შეზღუდვებზე გვაქვს, სულ მცირე, 7-8 საზომი. ეს გულისხმობს ინფექციის გავრცელების სიჩქარეს; ინფექციის გავრცელების კოეფიციენტს; დადებითობის მაჩვენებელს; საწოლფონდის სხვადასხვა მაჩვენებელს — როგორც ინტენსიური საწოლის, ასევე რეანიმაციული საწოლის. ასევე, ვითვალისწინებთ უკვე არსებულ კლინიკურ სასტუმროებში საწოლფონდს; პირველადი რგოლის გადატვირთვას.

ძალიან ბევრი მაჩვენებელია, რომელთა კორელაციის შედეგად ვიღებთ გადაწყვეტილებას. მხოლოდ ერთი მაჩვენებლის სიმძიმით გადაწყვეტილება არ მიიღება. მნიშვნელოვანი არის, რომ მონაწილეობდეს 5-6 ცვლადი და 5-6 ცვლადი იყოს მაჩვენებელი იმის, რომ საჭირო არის შეზღუდვა და მხოლოდ კრიტიკულ მომენტში ვიღებთ ამ რთულ გადაწყვეტილებას", — განაცხადა ეკატერინე ტიკარაძემ.

ჯანდაცვის მინისტრი ამბობს, რომ შეზღუდვის შესახებ გადაწყვეტილების მიღების მიღება მარტივი არ არის.

" მერწმუნეთ, საბჭოსთვისაც არ არის ადვილი, რომ საზოგადოებას გამოუცხადოს კიდევ ერთი ჩაკეტვის შესახებ, რომელიც ერთი მხრივ იწვევს ქვეყნის ეკონომიკურ კრიზისს და მეორე მხრივ, როგორც ჯანდაცვის მინისტრისთვის, ჩემთვის ძალიან მნიშვნელოვანია თითოეული ჩვენი მოქალაქის ფსიქოლოგიური მდგომარეობაც.

ასეთი ჩაკეტილობა სხვადასხვა ქვეყანაში ძალიან დიდ სირთულეებამდე მიდის და ასევე არის ჩვენს ქვეყანაშიც. ძალადობის მაჩვენებელი არაერთ ქვეყანაში გაიზარდა. ამის მომხრეები ჩვენ ნამდვილად არა ვართ და ვართ ძალიან ფრთხილები ამ გადაწყვეტილებაში", — აცხადებს ეკატერინე ტიკარაძე.

გაიგეთ მეტი იმის შესახებ, რაზე ისაუბრა ჯანდაცვის მინისტრმა პარლამენტში, მინისტრის საათის ფარგლებში ვიზიტისას: