ქართული ოცნების დეპუტატის, ირაკლი ჩიქოვანის თქმით, "არ არის ევროპელობა, ის რომ ევროპული მედიაციით შარლ მიშელის დოკუმენტის არასწორ პრეზენტაციას ახდენენ".

"გულწრფელად გეტყვით, რომ არ არის ევროპელობა, ის რომ ევროპული მედიაციით შარლ მიშელის დოკუმენტის არასწორ პრეზენტაციას ახდენენ. გულწრფელად გეტყვით, რომ როდესაც ტყუი და ცრუობ, რომ ამ დოკუმენტში არის საუბარი ე.წ. პოლიტპატიმრებზე, ესეც სიცრუეა. ეს არ არის ევროპული საქციელი. ეს არ არის ნამდვილად ევროპული საქციელი, როდესაც ვსაუბრობთ იმაზე თითქოს არჩევნები არ უღიარებია ევროპას და თითქოს არჩევნების შედეგებს გარკვეული ლეგიტიმურობის პრობლემა აქვს საქართველოში. მაგრამ, სამწუხაროდ, არამხოლოდ მე, არამედ მთლიანად საზოგადოებას ბოლო კვირის განმავლობაში რჩება შთაბეჭდილება, რომ ჩვენი ოპოზიციის წარმომადგენლებს ბოლომდე არც წაუკითხავთ ის დოკუმენტი, რაზეც ხელი მოაწერეს. არ წაუკითხავთ ის დოკუმენტები, რომლებიც ყველა საერთაშორისო ორგანიზაციამ გამოაქვეყნა და სადაც პირდაპირ არის საუბარი, რომ საქართველოში არჩევნები ლეგიტიმურად ჩატარდა", — განაცხადა ჩიქოვანმა პარლამენტის პლენარული სხდომაზე.

6-თვიანი ბოიკოტის შემდეგ 27 აპრილს ოპოზიციის ნაწილი პარლამენტში მივიდა. პარლამენტში პირველად მივიდნენ: ლელო, სტრატეგია აღმაშენებელი, რესპუბლიკური პარტია, გირჩი — მეტი თავისუფლება, ასევე, ინდივიდუალურად არიან სალომე სამადაშვილი, შალვა შავგულიძე. პარლამენტში არ არიან და დოკუმენტს ხელს არ აწერენ ნაციონალური მოძრაობა, ევროპული საქართველო, ლეიბორისტული პარტია და პატრიოტთა ალიანსი.

საკანონმდებლო ორგანოში უკვე არიან გირჩი და მოქალაქეები. მათგან ალეკო ელისაშვილის პარტია უკვე მონაწილეობს საპარლამენტო საქმიანობაში, ხოლო ხვიჩია, მეგრელიშვილი და რაქვიაშვილი აცხადებენ, რომ მხოლოდ საპარლამენტო ტრიბუნას გამოიყენებენ, ასევე, ისარგებლებენ იარაღის ტარების უფლებითა და დეპუტატის იმუნიტეტით.

პარლამენტში მისული ოპოზიცია დღეს, სავარაუდოდ, ამნისტიის შესახებ კანონპროექტს დაარეგისტრირებს, რომელიც შეთანხმების თანახმად, ნაციონალური მოძრაობის თავმჯდომარეს, ნიკა მელიას შეეხება. თუმცა საუბარია იმაზეც, რომ გათავისუფლდებიან სამართალდამცავი უწყების ის წარმომადგენლებიც, რომლებმაც 20 ივნისის აქციაზე ძალას გადაამეტეს. ასევე, პრეზიდენტი სალომე ზურაბიშვილი გიორგი რურუას შეწყალების აქტს გამოსცემს.

თავდაპირველად, ნაციონალური მოძრაობის თავმჯდომარემ, ნიკა მელიამ შეთანხმებაში გათვალისწინებულ ევროკავშირის მიერ შემოთავაზებულ გირაოზე უარი განაცხადა, თუმცა 26 აპრილს მან გირაოთი გათავისუფლებაზე მზადყოფნა გამოთქვა, იმ შემთხვევაში, თუ ამნისტიის კანონს უკან გაითხოვენ.

ევროპული საბჭოს პრეზიდენტის, შარლ მიშელის ახალ დოკუმენტს შვიდმა პოლიტიკურმა პარტიამ და ორმა დამოუკიდებელმა დეპუტატმა 19 აპრილს მოაწერა ხელი. ხელმოწერის ცერემონია პრეზიდენტის სასახლეში გაიმართა. ხელმოწერის ცერემონიას ონლაინ დაესწრო შარლ მიშელიც.