ლიეტუვის რესპუბლიკის საელჩოს ინფორმაციით, ლიეტუვის საგარეო საქმეთა მინისტრის, გაბრიელიუს ლანდსბერგისის ვიზიტი საქართველოში სამშაბათს, 27 აპრილს სომხეთიდან ჩამოსვლით დაიწყება და ხუთშაბათს, 29 აპრილს, მინისტრის აზერბაიჯანში გამგზავრებით დასრულდება.

საელჩოს ცნობით, ვიზიტის ფარგლებში მინისტრი შეხვდება საქართველოს საგარეო საქმეთა მინისტრს, პრემიერმინისტრს, პარლამენტის სპიკერსა და პრეზიდენტს. მათივე თქმით, დაგეგმილია შეხვედრები ოპოზიციური პარტიებისა და არასამთავრობო ორგანიზაციების წარმომადგენლებთან.

"დისკუსიები შეეხება ორმხრივ ლიეტუვურ-ქართულ თანამშრომლობას, ლიეტუვის მხარდაჭერას საქართველოს ტერიტორიული მთლიანობისა და სუვერენიტეტისადმი, საქართველოს ევროპულ და ევრო-ატლანტიკურ მისწრაფებებსა და ამ მიმართულებით გზას, აგრეთვე, ევროკავშირის შუამავლობით შემდგარი შეთანხმების შესრულებას. შეხვედრებზე, ასევე, განხილული იქნება რეგიონული უსაფრთხოების საკითხები, აღმოსავლეთ პარტნიორობის მომავალი სამიტისათვის მომზადება და საერთაშორისო პოლიტიკასთან დაკავშირებული სხვა რელევანტური საკითხები", — წერია საელჩოს მიერ გავრცელებულ განცხადებაში.

ვიზიტის განმავლობაში ლანდსბერგი ევროკავშირის სადამკვირვებლო მისიის წარმომადგენლებთან ერთად საოკუპაციო ხაზთანაც ჩავა.

მინისტრი ვიზიტს პრესკონფერენციით, შედეგების შეჯამებითა და მედიის მიერ დასმულ კითხვებზე პასუხის გაცემით დაასრულებს.