გირჩი — მეტი თავისუფლების ლიდერის, ზურაბ ჯაფარიძის განცხადებით, არჩილ თალაკვაძის ჩამოცილება და კახა კუჭავას წინ წამოწევა, ასევე, ოპოზიციასთან მოლაპარაკებებზე სხვა ადამიანების მისვლა, შეიძლება ნიშნავდეს იმას, რომ ხელისუფლება შარლ მიშელის დოკუმენტის ინტერპრეტაციას აპირებს. კერძოდ, საუბარია ამნისტიის კანონზე.

"შეიძლება თალაკვაძის ჩამოცილება, კუჭავას წამოწევა და სხვა ხალხი რომ დადის ახლა მოლაპარაკებებზე, მათ შორის გულისხმობდეს იმას, რომ ისინი აპირებენ ამ შეთანხმების ისეთ ინტერპრეტაციას, როგორც არ ყოფილა სინამდვილეში შეთანხმება. თუ ასე იქნება, ეს ნიშნავს, რომ ოცნება გადის შეთანხმებიდან, მარტივია ძალიან. მაგალითად, არ ყოფილა შეთანხმებული, რომ ჯალათები უნდა გათავისუფლდნენ. დაზარალებულის თანხმობა ჩადონ და მე ვიქნები ოქეი, დაზარალებულის თანხმობის გარეშე არ შეიძლება ვინმეს რამე ეპატიოს. თუ არ ჩადებენ, ხმას არ მივცემ", — თქვა ჯაფარიძემ პალამენტში.

მან, ასევე, აღნიშნა, რომ დღეს არაფერი იცვლება, გარდა იმისა, რომ ერთი პოლიტიკური პატიმარი ციხეს დატოვებს. საუბარია, გიორგი რურუაზე. რაც შეეხება ნიკა მელიას, ჯაფარიძე ამბობს, რომ ან დაიდება ამნისტიის კანონპროექტი, რომელსაც ორივე მხარე დაუჭერს, არ არ იცის, რა იქნება.

"იდეაში, შეიძლება მოხდეს ისე, რომ ნიკამ გირაო გადაიხადოს და ისე გამოვიდეს, ან როგორ შეიძლება განვითარდეს მოვლენები არ ვიცი. ამ წუთის მდგომარეობით, ერთიან დოკუმენტზე შეჯერება ვერ ხერხდება", — თქვა მან.

ამასთან, ჯაფარიძემ არ გამორიცხა ხელახალი ბოიკოტი, თუ "ოცნება გავა შეთანხმებიდან". კერძოდ, საუბარია ამნისტიის კანონპროექტზე, "თუ ეცდება ამნისტია წაიკითხოს ისე, როგორც ახლა ვისმენთ".

მისივე ინფორმაციით, ამნისტიის კანონპროექტი დღეს არ დარეგისტრირდება.

6-თვიანი ბოიკოტის შემდეგ 27 აპრილს ოპოზიციის ნაწილი პარლამენტში მივიდა. პარლამენტში პირველად მივიდნენ: ლელო, სტრატეგია აღმაშენებელი, რესპუბლიკური პარტია, გირჩი — მეტი თავისუფლება, ასევე, ინდივიდუალურად არიან სალომე სამადაშვილი, შალვა შავგულიძე. პარლამენტში არ არიან და დოკუმენტს ხელს არ აწერენ ნაციონალური მოძრაობა, ევროპული საქართველო, ლეიბორისტული პარტია და პატრიოტთა ალიანსი.

საკანონმდებლო ორგანოში უკვე არიან გირჩი და მოქალაქეები. მათგან ალეკო ელისაშვილის პარტია უკვე მონაწილეობს საპარლამენტო საქმიანობაში, ხოლო ხვიჩია, მეგრელიშვილი და რაქვიაშვილი აცხადებენ, რომ მხოლოდ საპარლამენტო ტრიბუნას გამოიყენებენ, ასევე, ისარგებლებენ იარაღის ტარების უფლებითა და დეპუტატის იმუნიტეტით.

პარლამენტში მისული ოპოზიცია დღეს, სავარაუდოდ, ამნისტიის შესახებ კანონპროექტს დაარეგისტრირებს, რომელიც შეთანხმების თანახმად, ნაციონალური მოძრაობის თავმჯდომარეს, ნიკა მელიას შეეხება. თუმცა საუბარია იმაზეც, რომ გათავისუფლდებიან სამართალდამცავი უწყების ის წარმომადგენლებიც, რომლებმაც 20 ივნისის აქციაზე ძალას გადაამეტეს. ასევე, პრეზიდენტი სალომე ზურაბიშვილი გიორგი რურუას შეწყალების აქტს გამოსცემს.

თავდაპირველად, ნაციონალური მოძრაობის თავმჯდომარემ, ნიკა მელიამ შეთანხმებაში გათვალისწინებულ ევროკავშირის მიერ შემოთავაზებულ გირაოზე უარი განაცხადა, თუმცა 26 აპრილს მან გირაოთი გათავისუფლებაზე მზადყოფნა გამოთქვა, იმ შემთხვევაში, თუ ამნისტიის კანონს უკან გაითხოვენ.

ევროპული საბჭოს პრეზიდენტის, შარლ მიშელის ახალ დოკუმენტს შვიდმა პოლიტიკურმა პარტიამ და ორმა დამოუკიდებელმა დეპუტატმა 19 აპრილს მოაწერა ხელი. ხელმოწერის ცერემონია პრეზიდენტის სასახლეში გაიმართა. ხელმოწერის ცერემონიას ონლაინ დაესწრო შარლ მიშელიც.