ნაციონალური მოძრაობის თავმჯდომარე ნიკა მელია მოუწოდებს ოპოზიციონერ დეპუტატებს, არ მიიღონ ამნისტიის კანონპროექტის კენჭისყრაში მონაწილეობა, თუ ქართული ოცნება დაიჩემებს, რომ ის სამართალდამცავი უწყების წარმომადგენლებზეც ვრცელდება.

"მე დარწმუნებული ვარ, რომ ქართული ოცნება პრინციპების დონეზეც კი, პირველივე დღესვე ჩაწერს, რომ უნდა გავრცელდეს ამნისტია მოძალადეებზეც. ამით უხერხულ მდგომარეობაში ჩააგდებს, პირველ რიგში, ხელმომწერებს და ხელმომწერებმა რაც არ უნდა მოინდომონ და გააკეთონ, რომ მოძალადეები იქ არ იყვნენ ჩაწერილები ამას ქართული ოცნება მაინც გააკეთებს და აპელირებას მოახდენს უკვე ხელმოწერილ დოკუმენტზე. [...]

თუკი ჩემი კოლეგები დარწმუნდებიან, რომ მცდელობა არის, სამწუხაროდ ქართული ოცნება გაჯიუტდა და დამნაშავეებს წერს კანონპროექტში, ასეთ შემთხვევაში მე მათ მივმართავ, რომ არ მიიღონ მონაწილეობა ამნისტიის კენჭისყრის კანონპროექტში", — ამბობს ის ციხიდან მთავარ არხთან სატელეფონო ინტერვიუში.

მელიას თქმით, კოლეგებს ოპოზიციიდან არ აკრიტიკებს დოკუმენტის ხელმოწერის გამო, მაგრამ ურჩევს მათ, რომ ფრთხილად იყონ.

"მე მგონია, რომ ქართული ოპოზიციის ის ნაწილი, რომელიც ამ სამუშაოებში მონაწილეობას მიიღებს ძალინ ფრთხილად უნდა იყოს.

ჩემს მეგობრებს, კოლეგებს, რომლებმაც ხელი მოაწერეს ამ დოკუმენტს, მე მათ არ განვიკითხავ, გამორიცხულია. არც ვაკრიტიკებ და ნურავინ მიიღებს ამას კრიტიკად", — განაცხადა მან.

დოკუმენტში, რომელიც ევროპული საბჭოს პრეზიდენტის, შარლ მიშელის ინიციატივით შემუშავდა ვკითხულობთ, რომ მხარეებმა ხელმოწერიდან ერთი კვირის ვადაში, რეაგირება უნდა მოახდინონ "პოლიტიზებულ მართლმსაჯულებად" აღქმულ ორ საკითხზე, ამნისტიის საშუალებით და/ან ისეთი ზომების მიღებით, რომელიც ანალოგიურ შედეგს გამოიღებს.

ამნისტიის საკითხს მოყვა არაერთი კითხვა იმაზე, თუ ვის შეეხება ეს კანონი. კერძოდ, სამოქალაქო საზოგადოებისა და ოპოზიციის ნაწილი წინააღმდეგია, რომ ის გავრცელდეს სამართალდამცავები უწყების წარმომადგენლებზეც, რომლებიც აქციის დაშლაში მონაწილეობდნენ. პარლამენტის თავმჯდომარის, არჩილ თალაკვაძის განცხადებით, ამნისტიის კანონი ზუსტად იმ პირობებით მიიღება, რაც შეთანხმებაშია. მისი თქმით, ქართულ ოცნებას ამ საკითხზე "არავითარი სუბიექტური ინტერესი" არ გააჩნია.

27 აპრილს, სამშაბათს, ოპოზიცია პარლამენტში შევა იმისთვის, რომ ამნისტიის შესახებ კანონი დაარეგისტრიროს.

გაიგეთ მეტი: