საქართველოს პარლამენტის წევრის, სალომე სამადაშვილის განცხადებით, ოპოზიციის მიერ გოგი წულაიას შესახებ გავრცელებულ განცხადებას ის ხელს არ მოაწერდა. აღნიშნულზე სამადაშვილმა On.ge-სთან ისაუბრა.

"ეს ყველაფერი არის, ალბათ გამოძახილი იმის, რომ ამ კონკრეტულ შემთხვევაში შეიძლება ეს ქალი არის რეალურად მართლაც მსხვერპლი, მაგრამ იმდენად მოშლილია ყველანაირი ნდობა ინსტიტუტების მიმართ და იმდენად დიდი არის ეჭვი, რომ სახელმწიფო, მმართველი გუნდი ყველაფერს აკეთებს პოლიტიკური ოპონენტების წინააღმდეგ და ყველაფერს იკადრებს, რომ ასეთი ვითარება არის შექმნილი. მე შემიძლია ვთქვა, რომ მე ამ განცხადებას ხელს არ მოვაწერდი, როგორც ინდივიდუალური პოლიტიკოსი, რადგან ზოგადად, ის, რომ მსგავსი დანაშაულის დროს ჩვენს ქვეყანაში მსხვერპლი კიდევ ერთხელ ხდება მსხვერპლი საზოგადოებრივი აღქმიდან, ეს არის სერიოზული გამოწვევა ჩვენი ქვეყნისთვის და ქალებისთვის ამ ქვეყანაში", — ამბობს სამადაშვილი.

ოპოზიციის წარმომადგენლებმა გოგი წულაიას მხარდასაჭერი განცხადება გაავრცელეს. მათი თქმით, ისინი სერიოზულად უდგებიან ნებისმიერ ბრალდებას ქალთა მიმართ ძალადობის შესახებ და არ აპირებენ ავტომატურად ეჭვქვეშ დააყენონ მომჩივანის მიერ გამოთქმული ბრალდებები, თუმცა წულაიასთვის აღმკვეთი ღონისძიების შეფარდება ხელისუფლების პოლიტიკურ მოტივზე მიუთითებს, ვინაიდან ანალოგიური ბრალდებების დროს აღმკვეთი ღონისძიების ეს ფორმა არ გამოიყენება.

საერთო განცხადება ევროპული საქართველოს პრესსამსახურმა გაავრცელა.

აღსანიშნავია, რომ ამ განცხადებას გაემიჯნენ ნაციონალური მოძრაობის წევრი, ხატია დეკანოიძე და სტრატეგია აღმაშენებლის წევრი თეონა ჭალიძე.

წულაია 17 მარტს ქალზე ფიზიკური ძალადობის ბრალდებით დააკავეს. თბილისის საქალაქო სასამართლომ მას აღკვეთის ღონისძიების სახით პატიმრობა შეუფარდა.

წულაიას თავდაპირველად ბრალი ძალადობის მუხლით წარუდგინეს, შემდეგ კი დაუმძიმეს და ამჟამად ის ბრალდებულია საქართველოს სისხლის სამართლის კოდექსის 138-ე მუხლის პირველი ნაწილით, რაც ძალადობით ჩადენილი სექსუალური ხასიათის სხვაგვარ ქმედებას გულისხმობს. დანაშაული სასჯელის სახედ და ზომად 4 წლიდან 6 წლამდე თავისუფლების აღკვეთას ითვალისწინებს.

ქალი, რომელზე ძალადობაც ბრალდება წულაიას On.ge-სთან საუბარში ამბობს, რომ ყოფილმა დეპუტატმა მასზე სექსუალურად ძალადობა სცადა, წინააღმდეგობის გაწევის დროს კი დაზიანებები მიიღო. იგი უკან დახევას არ აპირებს და შემთხვევისთვის სამართლებრივი შეფასების მისაცემად საკითხს ბოლომდე მიიყვანს.

"ჯოჯოხეთს გავდივარ ახლა. ღმერთმა ყველა დაიფაროს ამისგან. ამიტომ არაფრით არ ვაპატიებ. ჩემ უკან სხვა ქალებიც დგანან, გოგოს მშობელიც ვარ მეც და ამიტომ ბოლომდე გავყვები ამ ამბავს. არავის ვუსურვებ ძალადობის მსხვერპლი გახდეს და ის ჯოჯოხეთის გაიაროს, რასაც მე ამ წამს გავდივარ", — ამბობს ასმათ დვალიშვილი.

გოგი წულაია მე-6 მოწვევის პარლამენტის წევრი იყო. 2019 წელს ის ზესტაფონის მერობის კანდიდატად იყრიდა კენჭს. მარტის დასაწყისში მან პარტია თავისუფალი საქართველო დატოვა. მას შემდეგ, რაც TV პირველმა გაავრცელა ჩანაწერები, სადაც ისმის, რომ ბერა ივანიშვილი და ირაკლი ღარიბაშვილი სავარაუდოდ, "სჯიან" ადამიანებს, რომლებიც ბერას აგინებენ, გოგი წულაიამ მას უხმოდ, ხელების მოძრაობებით აგინა.