პარტია მოქალაქეების ერთ-ერთი ლიდერი, ალეკო ელისაშვილი აცხადებს, რომ ევროპული საბჭოს პრეზიდენტის, შარლ მიშელის ინიციატივით შექმნილ დოკუმენტზე ხელმოწერის ცერემონიისას ყველაზე ამაყი და თავაწეული თავად იყო.

"იმ დღეს, იმ დარბაზში, რა ვქნა, ვიტყვი ამას ხმამაღლა, იმ დარბაზში ყველაზე ამაყი და თავაწეული ვიდექი მე. გინდა ეწყინოთ, გინდა ნუ ეწყინებათ — ვიდექი იმიტომ, რომ იმ ჯოჯოხეთს გავუძელი, იმიტომ, რომ ვიცოდით რომ მაგ დღემდე უნდა მოვსულიყავით", — განაცხადა ელისაშვილმა პალიტრანიუსის ეთერში.

მან ისაუბრა პერიოდზე, როცა პარლამენტში შესვლის გამო სხვა ოპოზიციონერი ლიდერები აკრიტიკებდნენ.

"ერთი სული მაქვს ყველას დავუბრუნო ხურდა და გავცე საკადრისი პასუხი, მაგრამ, არ გამოდის. ქვეყნისთვის იქნება ცუდი. ძალიანაც მართლები ვართ და ცამდეც მართლები ვართ მეც, ლევანიც და ჩვენი პარტიაც.

გული მიჩუყდება ახლა რომ მახსენდება იმ ჯოჯოხეთურ დღეებში და კვირებში, რაც გავიარეთ ჩვენ, როგორ ვამხნევებდით ერთმანეთს. მთელი ჩვენი გუნდი. როგორ ვამხნევებდით, იმიტომ, რომ ჩვენც ადამიანები ვართ. თან, აბსოლუტურად დაუმსახურებლად რომ გაყენებენ, ეს ოხერი, შეურაცხყოფას, როგორი მოსასმენია?! თან რომ იცი, რომ მერე ისინიც იმას გააკეთებენ, რასაც შენ აკეთებ. უბრალოდ, შენზე იწმენდენ ახლა ფეხებს. გიჭირს ემოციურად ადამიანს", — ამბობს ელისაშვილი.

19 აპრილს ევროპული საბჭოს პრეზიდენტის, შარლ მიშელის ახალ დოკუმენტს შვიდმა პოლიტიკურმა პარტიამ და რამდენიმე დამოუკიდებელმა დეპუტატმა მოაწერა ხელი. ხელმოწერის ცერემონია პრეზიდენტის სასახლეში გაიმართა და ონლაინ-რეჟიმში თავად მიშელიც დაესწრო.

გაიგეთ მეტი: